حچاية التنگال ٢٤٨٥

د.سعد العبيدي

حچاية التنگال ٢٤٨٥

بقينه العمر كله وبقوا الي سبقونا عمرهم كله، يريدون يعرفون ليش الهلال السني يطلع گبل يوم من الهلال الشيعي، حتى لو مغيمة أو گابه عجاج ومدى الرؤيا صفر بكل البلدان الإسلامية؟ وليش ما يعتمدون كبار القوم والحكام والمعنين بالدين الحسابات الفلكية، والوسائل الفنية الي بوكتنا هذا صارت تگدر تشوف الثقوب السوداء بنص السما، وتدور بين النجوم والمجرات شكو ماكو، واشلون تكونت بالأساس.
بله هاي داوركيسه خلونه نحسبها قلة معرفة، ونقبل دوختها مثل ما قبلوها أجدادنا وورثوها النا مشكلة من بين هواي من مشاكلهم الي ما الها تفسير، لأنها ما مأثره على وضعنا النفسي والأمني كلش هواي، أو لان عقولنا الخدرانه تقبلتها وتعلمت عليها حقيقة من أول ما بدت الطوائف وصار الاختلاف، وراح تبقى الى آخر الزمان حتى يبقى الاختلاف، ويبقون المستفيدين عايشين على هذا الاختلاف.
لكن الى يحيّر أكثر ويدوخ الي ما يدوخ، اشلون ملوية سامراء وجامعها الى من يوم ما انبنوا لهذا اليوم همه سنة وتابعين للوقف السني، وأسمائهم مثبته بكتب التاريخ سنية من أب سني وأم سنية، يريدون يبدلون مذهبهم ويسووهم شيعة، يتبعون العتبة العسكرية والوقف الشيعي؟ هاي الي محد يگدر يفتهمها، ولا يعرف توقيتها بهذا الوكت ليش؟
بالله عليكم هسه وكتها، ومتفهمونا اشراح تفرق النا المسلمين إذا الملوية بقت سنية أو استشيعت، ليش هذا الإصرار على استمرار الاختلاف وبقاءه ورث ننقله للأجيال الي راح تجي بعدنا وتبقى تشتم وتدعي علينا الى يوم الدين!!

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

809 زائر، ولايوجد أعضاء داخل الموقع