الگاردينيا - مجلة ثقافية عامة - حچاية التنگال ٩٧

حچاية التنگال ٩٧

                                                    

                               د.سعد العبيدي

حچاية التنگال ٩٧

قبل أيام وبمدينة الشعب وبشارع عدن بالتمام والكمال والناس تروش بالشارع، ولن تجي سيارتين بيكب جديدهَ لونها أبيض چنها حكومية ولو بأيامنا هاي صاير تقليد السيارات الحكومية والملابس الحكومية وغيرها أسهل منه ماكو، ويمكن أسهل من تقليد المصانع الصينية للبضائع الي يشتروها تجارنا.
المهم وگفن السيارتين گبال بيت وبكل سياره گاعدين دستة شباب كل واحد منهم متْحَنبُطْ ببندقيته كلاشنكوف روسي أصلي نص أخمص ومسدس بحزامه، ولا تگول عبالك رامبو. ومو بس هاي ناصبين على قمارة كل سيارة رشاشه بي كي سي تلهث.
وگفت السيارتين والبيت يبين فارغ أهله عافوه بداية الشهر ومحد يدري بيهم وين صاروا، وبعد ما أخذوا مواضع مسَيّطرهَ بدوا يرمون الشباب اشلون الأفلام وصارت كولبه عبالك الواحد بساحة معركة ما بيها عدو.
وصار بعدها مطافَرْ الناس ما اله والي.  
أريد أسأل أهل الراي والمعرفه وأهل الغيره والمنْتَخهَ على هاي الناس الي ما منها رجه:
هاي السيارات المن؟.
والرشاشات الجديده تطلع ترمي وتصول عليمن؟.
والعتاد الكرخانه المستورد بفلوس زينه واحنه مفلسين على مالمن؟.
والشرطة والحرس والأمن والعسس وقياداتهم وين صارن.
وكل هذا الي صار والي دا يصير من گورمنْ؟.
جاوبني واحد يفتهم چان واگف على صفحه شافني دا أدردمْ .
گال ذوله دگو البيت.
كتله شنو دگو البيت خو يروحون يدگون الجرس.
گال لا انته اشدا تحچي دگوه عشائرياً يعني عدهم طلبّةْ فصل ويه أهل البيت وما ماخذين عطوه.
بله عليكم إحنه وين گاعدين ومعقوله العشاير تلعب بينه لعب؟.
الله ينتقم منكم ومن كل شيخ كلك.      

الأبراج وتفسير الأحلام

المتواجدون حاليا

539 زائر، ولايوجد أعضاء داخل الموقع