ما تشوفون بگوع شلون عاوج ذيلو!!؟؟؟

ما تشوفون بگوع شلون عاوج ذيلو!!؟؟؟

مو مرة الف مرة كتبنا و حچينا بالمجالس الخاصة والعامة:
الإدارة فن وممارسة و لايجوز اطلاقاً اللي مايعرف الچك من البوك وتخلي بمنصب بعيد عن ذلك المنصب بعد السما عن الأرض.
الأخ المرشح اكيد مايرفض هذه الوظيفة كودن قبل الوظيفة كان( هبياض وكلشي ماكو) شلون مايرگصلها بچفية اذا تعين بمنصب وزير أو وكيل وزير وحتى عضو برلمان أو محافظ أو مديرعام!!.
يا ناس يا عالم المفروض يكون الشخص المناسب في المكان المناسب!!.
وحق ابو الجوادين والعباس ابو راس الحار شفنا العجب العجاب من الأخوة النشامي اللي جابتهم أمريكا وجمهوريتهم اللا اسلامية.i
- ضابط امن فاشل بكل المقاييس يعين وزير للدفاع ووزير الثقافة بالوكالة!!.
- اريد اعرف شلون رهمت هذه؟؟؟ هذه مثل مسألة الدولمة والجلاق وأوجه الأختلاف!!.
- لو يجيبون واحد يحمل الدكتوراه(من سوگ مريدي) ويتعين سفير في دولة چبيرة وهو بحياته ما مستعمل چطل وخاشوگة بل طول عمره ويه الناس بالأفراح و الفواتح والمناسبات الدينية يضرب الثريد بالخمسة ويتربع بالگاع ومن يگوم يمسح ايديه بدشداشتة وكلش طبيعي!!.
- هو لو كان شخص عادي ومايمثل العراق أبدا مابيها شىء خلي ياخذ راحته وعلى اقل من مهله وياكل مثلما يريد ومحد يلومه اطلاقاً!!.
- أقسم بالله شفت وزير والفيديو الى آلآن موجود يكرر أكثر من مرة( وفرحان أوووي) انه خلال زيارته لسوريا التقى(بضخامة الرئيس السوري) فسيادة الوزير بدلا من فخامة الرئيس كل ظنه ان المصطلح الصحيح هو ضخامة الرئيس ، وعندك الحساب!!.
- وعشرات الأمثلة اللي ما اريد ادوخكم بيها..
- لا ادافع عن اي نظام ولكن بالله عليكم ممكن مقارنة العراقي الكبير الدكتور محمد مهدي صالح وزير التجارة و نجاحه الباهر اثناء الحصار بالبطاقة التموينية وكل اللي اجوي من بعده وبكل الوزارات؟؟.
- مرات شخص مايحمل شهادة اكاديمية عليا ولكنه بالممارسة يتقن عمله ويمشي الأمور ولكن مو بمنصب مستوى عال كوزير مثلاً والامثلة كثيرة.
- المعضلة ان (الأغلبية) اللي يحكمون هو صحيح يدعي يحمل شهادة (اغلبها مزورة) ولكن ما عنده ممارسة ولا اشتغل بأختصاص معين ولا تجارب في الحياة الوظيفية ..مثلا:
- كان يبيع خضرة وفواكه بدكان في دولة اوربية مساحته بمساحة غرفة وعلى غفلة صار وزير للداخلية بالوكالة ولسنوات كل مؤهلاته انه عضو قيادي بحزب موالي لأيران وإلا لاخبرة ولا كفاءة و لا ممارسة أو اختصاص ، تصوروا وزارة مثل الداخلية يترأسها شخص مايعرف غير اسعار الخضراوات و الفواكه و دبس و طحينية وطرشي و شراء المواد من العلوة وبس!!.
- الشغل مو عيب ولكن هكذا شخص وبهذا المستوى ممكن يتعين مدير قسم بوزارة التجارة أو الزراعة أو مدير حقل دواجن أو مطحنة حبوب مو وزير داخلية و يخمط نسبة چبيرة من ميزانية الوزارة و لسنوات و عينك عينك ولا واحد يگدر و يتجرأ يگوله على عينك حاجب!!.
- وأخر قصخون في دولة كبرى و فجأة يستلم وزارة التربية وبعد فشله يتعين نائب رئيس جمهورية وبعد مرض الرئيس يصير رئيس بالوكالة لسنوات وحتى هو ما مصدگ ياترى صدگ ؟؟چذب؟؟ وشنهي السالفة؟؟ ولليوم راتبه كذا مليون ويستلمها بالدولار و يستاهل كودن هو الأخر عضو قيادي بحزب تابع لخواله الأيرانيين!...والله العظيم حالات ولا بالخيال!!.

- رسالة من الأخ( ابو عمر) من الرمادي ، بعد السلام والتحية كتب النه يلول:
بگوع!!

 چان اكو واحد من جماعة الأنواء الجوية يگول :

رحنه بجولة في البادية العراقية في فصل الربيع لمعرفة حالة الطقس خلال ال ٢٤ ساعة القادمة ،وقد استخلصوا أن الطقس سيكون صحو خلال ال ٢٤ساعة القادمة ،ورأوا في البادية بيتاً من الشعر لأحد البدو كان فيه عجوزاً مسنةً وابنتها فاستضافتهم وأدخلتهم البيت وقامت بواجب الضيافة وإعداد الطعام وبينما هم جلوس في بيت الشعر سمعوا العجوز تقول لإبنتها: شدّي حبال البيت والرواق لأن دنيانا مطارة!!!.

فاستوقفتهم عبارة العجوز وقال لها احد الموظفين:
حجية احنا جماعة الأنواء الجوية واليوم الجو سيكون صحو خلال ال ٢٤ ساعة فمن أين علمتي أن المطر سينزل بغزارة؟؟؟!!.
 قالت العجوز:
ياولدي بگوع جاء عاگص ذيلو (تعني الكلب أجلكم الله)!!.

فضحكوا من قولها وبعد لحظات نزل المطر كأفواه القرب!!!.
 فقام احد الموظفين ومزق ما معه من أوراق وقال والله لن أعمل في مهنة بگوع يتقنها أحسن مني!!؟
رباط السالفة
 ولكم بويه اللي ما عنده خبرة ودراية بأمور ادارة البلاد والعباد ليش يورط نفسه ترى ادارة الامور مو بالنية ولا بالدعاء ولا بركضة طويريج!!.
-------
 وأني ماعندي اية اضافة سوى:
 والله العظيم هذه العجوز و كلبها أفهم من حكومة العتاگة لابل مايوصلون الى ربع فهمها بهواية أمور..
اودعكم بالله وكان الباري في عون اهلنا وناسنا والى اللقاء بلقاء اخر وكل يوم أنكرر:
- اللهم احفظ العراق و شعب العراق ... آمين يارب العالمين.
- أخوكم/ رئيس التحرير

  

إذاعة وتلفزيون‏



الأبراج وتفسير الأحلام

المتواجدون حاليا

845 زائر، ولايوجد أعضاء داخل الموقع