لو يعدموني مثل زلخا أباب الشرجي أظل أگول الحق و ما أخاف /١٦

التفاصيل

تم إنشاءه بتاريخ الخميس, 30 تموز/يوليو 2026 08:56

كتب بواسطة: أبو حمودي البغدادي

أبو حمودي البغدادي

لو يعدموني مثل زلخا أباب الشرجي أظل أگول الحق و ما أخاف /١٦

- خير أبو حمودي أشو اليوم شايل كتلوك مالة سيارات غريبة وعجيبة، انشاء الله ناوي تشتري وحدة منهن؟؟.

منو أني؟؟.
- لعد منو؟؟
أخوية الله وكيلك ما أكدر أشتري ماطور سكل ، من يومها طلعتلي تويوتا 1980 من الشركة العامة للسيارات هي هي وماغيرتها ، كانت أيام حلوة كلمن ياخذ نصيبة والأسعار كانت بفلس و نص قياسا باهالأيام، اليوم كل العالم عدها الملايين من الدنانير العراقية و ماجيب غير تك توك ، وللعلم فقط الدول التعابة تتعامل مع التكتوك ومثل ماتشوف دول العالم سيارتها الأجرة أحدث الموديلات واحنه مثل ... البعير نرجع ليورا!!.
- كلامك صحيح وعاراس ، بلاكد ما وضحتلنا شنو سبب هالكتلوك وكلها سيارات أخر موديل واسعارها نار كبرة.
بالحقيقة جيبتها أريد أسألكم على اسعارهن ؟؟ صحيح يكولون كلها بالدفاتر و بلوكات؟؟.
-اكيد أشو ناولنياها.. أيباااخ أخوية هذه مو كل واحد يكدر يتكرب منهن ، شوف على سبيل المثال هذه اسمها (جكسارة) سعرها بحدود 180 مليون دينار وحسب الموديل.
أما ألأخريات ، لا أكثر بهواية
معقولة؟؟
-معقولة و نص ، لعد شعبالك؟؟.
طيب وهذني منهو يكدر يشتريهن؟؟.
-أكيد على الأغلب 97% الحرامية مالة هالوكت.
بس أشو يالشوارع اشوف اغلب اللي راكبيها هن نسوان ، ياترى هذني نسوان الحرامية..
-خوش سؤال وحطيت ايدك عالجرح، بالحقيقة هذني اللي تشوفهن أغلبهن رفيجات وحبيبات جماعة المنطقة الخضراء ، يشتريلها شقة بالملايين وأمثثها أثاث خمس نجوم وخدم وحشم وسيارة من هالسيارات وابوك الله يرحمه.
أني هم توقعت هيج ، ياترى الحكومة والنزاهة ماعدهم علم بهذه الحالة؟؟.
- ابو حمودي انت ليش تغشم روحك ، طبعا يعرفون ونص.
لعد ليش ساكتين؟؟؟
-ساكتين كودن كلهم بالهوا سوا و العاقل يفهم الاشارة.
تعرف أني لو بمكان رئيس الوزراء علي الزيدي أوجه الجهات الامنية وينصبون سيطرات خاصة وكل وحدة تمشي بالشوارع وراكبه هالسيارات اخذها للتحيق خاطر يعرفون مصدر السيارات!!.
-أبو حمودي رحمة على أبوك أنت تحجي شكد بالشهر، هذا مستحيل.
لعد إذا هاي مثل ذيج خوش مركة وخوش ديج!!.
خليها سكتة .. وينك ياولد جايات وماي..فقط قهر في قهر و النتيجة هابياض.. وياك جيبنة الدومنة خلي نلعب داس ازنيف ويه أبو حمودي!!.