لو يعدموني مثل زلخا أباب الشرجي أظل أگول الحق و ما أخاف /١٢

التفاصيل

تم إنشاءه بتاريخ الإثنين, 29 حزيران/يونيو 2026 07:50

كتب بواسطة: أبو حمودي البغدادي

أبو حمودي البغدادي

لو يعدموني مثل زلخا أباب الشرجي أظل أگول الحق و ما أخاف /١٢

- هاي وينك أبو حمودي؟؟ گلبنا الدنيا عليك گلب.

خير ان شاءالله؟؟
- يا معود مگلوبة الدنيا أنت وين نايم؟؟
والله لا نايم ولا هم يحزنون.. گاعد بالبيت وأتابع الأخبار وأگلب بالقنوات الفضائية و تصريحات المسؤلين و أضرب أخماس بأسداس و حاير بأمري!.
- ليش؟؟
شنو ليش اخوية مو صارنه سنوات أنصيح وانعربد وماكو اذان صاغية ، راح رئيس وزراء واجه الأخر و نفس الطاسة ونفس الحمام والحرامية عينك عينك يزدادون وماكو أية حركة لا من الحكومة ولا من البرلمان كودن أغلبهم حرامية وفاسدين و طززز بالشعب جوعان عريان ومن دون خدمات اساسية و الباقي تعرفوها كلكم.
- طيب ورأيك بخطوة الأخ علي الزيدي؟؟.
على راسي ، شجاغ وجرىء و اخو خيته ولكن!!.
- شكو؟؟.
لا زم ما يستثني الحيتان الكبار..هاك أقرأ:

تتركز أقوال لي كوان يو، مؤسس سنغافورة الحديثة وأول رئيس وزراء لها، حول الجدية المطلقة في القضاء على الفساد. من أشهر أقواله:"إن تنظيف الفساد مثل تنظيف الدرج.. يبدأ دائماً من الأعلى إلى الأسفل""إذا أردت أن تبني حكومة نظيفة، فلا بد أن تُسلّم مقاليد الحكم لمن لا يخشون الفقر، ولديهم ما يكفيهم من العيش الكريم، حتى لا يكونوا عرضة للرشوة.""التسامح مع الفاسدين هو خيانة لأمانة الحكم.
هساع صار معلوم! نعني مويجي على الصغار و يعوف الحيتان اللي سرقوا الجمل بما حمل و الشعب المسكين محروم من كل الخدمات الأساسية.
لابد أن يضرب بيد من حديد ، والله العظيم اذا سواها ليلتف كل الشعب العراقي( عدى الفاسدين) حوله وليصير بطل حقيقي و يدعوله ويساندوا للأخير ولكن اذا اكتقى بهالكم واحد لاوالله الشغلة بايگه هوا ومجرد عرض عضلات لاغير.
- طيب وبرأيك شعجب اللي قبل الزيدي ما سووها؟؟.
اخوية والله العظيم تحچون الصخر، شلون يسووها هم أكبر الفاسدين وفرغوا الخزينة العراقية ومابيها ولا پارة، عجيب أمركم ، انطوني رئيس وزراء نزيه من المالكي وانت نازل!.
- ماكو.
طيب اذا بلا جواب اتضح كلشي و كلاشي والالف ميل تبدأ بخطوة وبداها الأخ ابو حسين وننتظر النتائج وشخصيا عندي أمل انه يكمل المشوار و يحسن وضع اهلنا وناسنا بأذن الله.
- الله يسمع من حلگك.. تعال ياولد جيبنة چايات وننتظر وصحيح من گال: تفائلوا بالخير تجدوا.. نتفائل و الله كريم.