صفگت الإيد ابلإيد

ميسون نعيم الرومي

صفگت الإيد ابلإيد

نلهي اونظل للموت .. يادنية ليويـن
حظنه نندبه اسنين ! والوكت عقدين
***
حظنه نندبه اسنين ! والدمع بالعين
كتلوْ ولدنه اذناب .. ماتسـوه فلسـين
***
خيرهم امجدي چان ، صايع اوضايع
ملكـوْ المليـارات ، والشــعـب جايـع
***
جايع شـعـبـنـه دوم حايـر ابأمـره
ساكت اومدري ليش والعيشه مرَّه
***
عيشة مذله اوعوز والنفط نجم
تاكل الخبز الحاف أمرك امسلم
***
أمرك امسلم ليش بيدك خلاصك
لو يطلع المليون اتحقـق مـرادك
***
ولدك ولد تـشـريـن ما سـانـدتهـم
بابشع طرق واسلوب سيحوْ دمهم
***
سيحوْ دمهم اوف حرموهم العيش
صفگت الإيد ابلإيد أمهم .. اوليش
***
امهم تنوح اسنين تطلب ابدمهم
متنعم اومرتـاح سـافـل كـتـلهم
***
سافل امن الأذناب قاتل ولدنه
باگوهه للثروات والونـَّـه النه
***
اصحه يشعبي اوثورلا ترضه بالذل
لو تطلع ابمليون تتراكض الكل
***
حقه شعبنه ايعيش عيشه سعيده
ياهو اليجي يوليه يگطع وريده
--------------------
13 / نوفمبر/ 2022
ســتوكهولم

 

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

801 زائر، ولايوجد أعضاء داخل الموقع