شعر غنائي - مدري شوصفك يا ترف

ميسون نعيم الرومي

شعر غنائي

مدري شوصفك يا ترف

 

يبو تواليت وامشـَّط صفح – والبكله چن لون الذهب
هيمان بعيونك سحر – واسهامك اتصيب الگلب
لو عض على الشفه وفر - دم الورد ع الخد لهب
بجبينك ايهل الگمر – بالروح نيران اوتشب
دلوع تتمايل غوه - يالمايع اميوع الرطب
البحه وابصوتك غنج - بلبل غرد حچيك عذب
الوانك البحر اوسمه – بعيونك الكلهن عتب
محله الجفن ما ينوصف - غار الكحل من الهدب
امطرزعلى اذراعك وشم – من الحسد چن منكتب
مدري شوصفك يا ترف - قداح من تمشي بالدرب
بعيونك اوترمي السهم – جرحين صارن بالگلب
طاير على اجناح الهوى – واليوصل الحدك صعب
هنياله لبحبك حضه – يا تين وايباهي العنب
يبو تواليت وامشـَّط صفح – والبكله چن لون الذهب
----------------------
16/تشرين الأول/2020
ســـتوكهولم

الأبراج وتفسير الأحلام

المتواجدون حاليا

528 زائر، ولايوجد أعضاء داخل الموقع

تابعونا على الفيس بوك