عيش وشوف !!! بس شلون عيشة ؟؟؟؟؟

                                           

                        سيف الدين الألوسي

عيش وشوف !!! بس شلون عيشة ؟؟؟؟

ديج يكرك عل البيض ويتوحم ،، وعگرك يجيب كواسج بلية سنون ،، وأسد يتمرگص ويصبغ ميش ويحف ،، وذيب املط يسمع دي ليلى ويتمقلج ،، وثعلب صادق وواعظ ديني متعاطف مع الدجاج ،، وهر عتوي يخاف من الجريدي ليعضه ، وخنزير يحلف بغيرته وبشرفه ،،، وسمچ يفرچ سنونه بسيغنال ،، وزمال يفتهم بالميكانيك الكمي ومعادلة شرودنغر ! ويناقش اينشتاين بنظريته ،، ونعامة عدها صوف مليان كشره وتستعمل شامبو سان سلك ! ،، وثور بليه صماخ يحلبوه ،،،،، وبغل يفتخر بأخواله !!! ودب يسوي شيره ومانكير وبادكير ،،، وفيل مشتري گصبة حتى يشرب بالبطل ،، وارنب ياكل ملوخية بالفراخ ،، وحية توزع چبن مگطن وببسي واستمارات هجرة !!! وصقر لابس مناظر طبية ،، وحمامة تقصف بالمدافع وتوزع بوكسات حديد !! ،، وبلبل ياكل پاجة ويشرب سڤن ويتريع ،، وشادي يشتغل بالسياسة ويكرز حب ،، وخفاش يشوف بالنهار ،، وبومه تغني وتركص ليل ونهار ودك چمبارات وتهز رگبه ،، وصرصر خال ريحة وشعره تواليت ويعلچ ،،،،وابو بريص مسوي بكله ولابس تراكسوت نايك ويستصرم براس العگد !! وذبان نايم بالايركوندشن ويتأفف من الكهرباء حتى يسافر للبنان !! ،، ونحلة نايمه للظهاري تستورد عسل وشمع من بلاد النمل !! ،،وجرادة تلعب ايروبيك و٢٤ ساعة بالجم و تضرب ابر نفخ ،، وشعوب غنية جدا بطرانة ،،، وشعوب فقيرة وكاتلها الضيم والهبري ، حايرة بنص الدرب محتارة !! ايهما اغبى الطرن أم الاثول أو الدماغسز !!! ملتهية بالريال وبرشلونة !!!
واقع حظنا السعيد اليوم !!!!! وكورونا دتلعب دانص بينه وحصرتنه خوش حصرة ،، وقسمت الدنيا وثولتها !! وسباق ريسز بين الحصانين الفيڤرت ترامب وبايدن والنتيجة على التصوير واوبجيكشن على الفائز ونحن ننتظر غودو المخرف !!
حتى مالك الحزين خربان من الضحك على هذا الزمن المخالف ،، ورح يسوي جبهة وحلف مع اللگالگ و الغربان ويؤجرون بيبيات متو من كل البلدان ، تتكلم باسمهم بكل اللغات والقنوات وعبر الاقمار الاصطناعية وخدمات التواصل الاجتماعي !!!!!
مندري ،، الواحد شيسوي !!
لو احنه مخرفين ومخالفين عن البشر لو الدنيا دتمشي مكلوبي !!!!
رح نتخبل رسمي ووين نوللي !!!
حتى الگبور قبطت !!!!!!!!!!!!!!!!!!!!

الأبراج وتفسير الأحلام

المتواجدون حاليا

465 زائر، ولايوجد أعضاء داخل الموقع

تابعونا على الفيس بوك