حچاية التنگال ٥٩

                                                        

                                د.سعد العبيدي

ثرّنا على الملكية عام ١٩٥٨ وگلنا اقطاع وشيوخ ظلّامْ ومتخلفين، ولزمنالهم الحبال وخمطنه گيعانهم بس بالقانون، وما سألنه نفسنه هذا الي دا نسويه شنو؟.
 وبعدها الشيوخ كرصوا كرصة الزينه وشلنه العشيره وخليناها على الرف فوگ الخمسين سنه وفوگاها منعنه الألقاب حتى ندفنها للأبد باعتبارنا دوله مدنيه وهم ما سألنه نفسنه إشدا نسوي؟.

وبقدرة قادر صبحنه الصبح لن البرلمان مالنه الي حل كل مشاكلنا گال باقيلنه مشكله ازغيرونه خلونه نحلها ونغلب العالم بالأمان والسعاده وهي العشيره والحل:
نسويلها قانون.
معقوله يا برلمان آخر الزمان، العالم يمشي ليگدام وإنتو ترجعونه ليوره مثل بول البعران.
عمي علواه على بول البعير بالجزيره گاموا يشربوه ويگولون دوه اسلامي.
أگول إحنه بلا قانون عشاير ما خلصانين منها ومن الشيوخ اللگف ومن سوالفهم لمن يِفْصلُون  الحرامي والله انضرب راشدي، وياخذون دية العاهر، ويگاومون الطبيب الي يكَشِفْ إصدور نسوانهم، عاد انوب نسويلهم قانون، اشراح يفظها واشلون تسوولهم مجلس يعني تشيخون على الشيوخ شيخ والشيخة فرخت بكل قبيله ألف شيخ.
أهل الراي يگولون القانون ينظم ويعَقِلْ العشيرة.. معقولهَ تعقل بعد كل هاي الخربطة وبعد ما العقال عدنا اتخبلوا!.
اتذكروني اذا ما صارت مشاكلهم لأبو موزهَ.
ثم من تسوولهم مجالس يريدون رواتب ومقرات وسيارات مدرعه منين تجيبون والخزينه بح، مو اذا ما انطيتوهم يهيجون عليكم.
يا أمة الجهل ميصير هذا الحچي ليش تخلون الناس تطلع من طورها.
هو هذا البرلمان الي ردناه عون ليش يطلعلنا فرعون.
واشلون فرعون شايل بوري وواگعلنه هبد منين ميوجعنا.
عسانا وبأبو زايد.

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

729 زائر، ولايوجد أعضاء داخل الموقع