حچاية التنگال ٥٧

                                                          

                                  د.سعد العبيدي

للمتزوجين من گبل والي يفكرون راح يتزوجون هسه لو بعدين.

ديروا بالكم تزَعّلُون نسوانكم لو تضوجهن، تره يصير بيكم مثل ما صار بابن غاطي، والي مرته خيريهَ بَرعّهَ وتلاسنهَ هواي.
وفد يوم وبعد مقدمات بيها حبيات، گاللها يا مرهَ خلينه نبيع بيتنا ونشتري بيت بمكان قريب من شغلي لأن يومية رايح راد والله تعبت.
گالتله شتگول ولك بن غاطي، گطنه وشيلها من اذنك، هذا يم أهلي وين تريد توديني آخ منك دومك تريد تنفرد بيَ.
صار عصبي وگاللها:
والله لأنعل أبوچ لأبو أهلچ، اشخبصتينا بأهلج.
صاحت يبوه تشتمني ابن المجَدِي الى مات ما شبعان خبز، والله لأطربگها على راسك وراس الخلفوك.
وشالت چوالاتها بذاك الليل وعافت جهالها الثلاثهَ وراحت لأهلها الي بيتهم مو بعيد عن بيتها.
اخوتها ما چذبوا خبر ثاني يوم جابوا بويه سودهَ أم النسر، وكتبوا على البيت ما ينباع مطلوب عشائرياً.
راحلهم من رجع من الدوام وماخذ وياه أخوه الچبير وگاللهم:
عمي عوفوا البيع بَطَلِتْ، ويا حچايه ردي الـ مچانچ، خلوني هسه أرجع مرتي، كفرت خوما كفرت.
رد عليه أخوها الزغيّر:
ولك ابن غاطي لو كافر أحسنلك تشتمنه منعول الوالدين.
جاوبهم أخوه:
يمعودين إغزوا الشيطان جهاله منو الهم.
تدخل أخوها الوسطاني وگال:
ولك إنت خلگ شرطي من يومك فگر، وغيرك منغنغين نسواهم ذهب وفلوس.
گللهم منين حتى ما ضل شي ينباگ.
صاح الثالث:
هذا مو شغلنه يالـه اطلع بره.
صاحبنه لگ اصوابهَ وطلع.
البيت مينباع والجهال دايحين وخيرية تطلگت وتزوجت المفوض.
گولوا ما گلتلكم.     

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1176 زائر، ولايوجد أعضاء داخل الموقع