الگاردينيا - مجلة ثقافية عامة - حچاية التنگال ٢٣٥

حچاية التنگال ٢٣٥

                                       

                        د.سعد العبيدي

من نگول إفصلوا الدين عن السياسهَ، لأن بيها لوفات وچذب، والدين أمانه وصدق، يزعلون. ومن أحد يگول تدخل السياسة بالدين يفسده، وتدخل الدين بالسياسة يقيّدها تنگلب الدنيا.

واذا گلت لليحكمون بالدين لا تستعجلون بالتغيير، وگبل تروحون تحللون وتحرمون، راح يكفروك ويذبوك بالنار وانت بعدك بالدنيا.
وإذا گلت يابه تره عدنه تجارب من گبل استعجلوا بيها الربع وبدلوا وغيروا وتالي كلشي اتبخر بيوم واحد، يگلولك احنه غير وهمه غير.
يا جماعه تره والله نفس الشي، الاختلاف بالنوايا وبس، باوعوا من أهل الدين دخلوا بالسياسة، واتصوروا نفسهم فوگ الدوله، گاموا يتدخلون بشغلاتها الچبيرهَ والزغيرهَ، وآخرها خطيب جمعة ببغداد، حزبه بالحكم، عاف مصايبنا كلها وحچه بخطبته عن الآثار المو زينه للسياحهَ بالأهوار بعد ما صارت من التراث العالمي، وخايف خطيه من العلاقات غير الأخلاقيهَ الي ممكن تصير.
شيخنا هي بقت عند الناس أخلاق؟.
وأزيدك من الشعر بيت تره مو بس احنا وحدنا بهاي الدنيا ونلعب بكيفنا، عمي أكو شي يسموه الحراك الاجتماعي العالمي، يغيّرنا غصباً علينا.
وأكو حقائق ياريت تعرفوها مثل الدعارة الي انت خايف منها تره زادت بالتسعينات والحملة الايمانيه بزرها بذاك الزمان ما قللت منها، وتضاعفت بعد السقوط وكل الوادم تصوم وتصلي، واتضاعف وياها الفساد والمخدرات والبوگ، حتى ما بقت أخلاق ينخاف عليها.
المشكله مولانا مو بتطبيقات الدين، بالفقر والجوع الي نسّانه أصل الدين. متگلي ليش الامام على (رض) گال (لو كان الفقر رجلاً لقتلته)؟.  
الله وكيلك ومحمد كفيلك خلصونا من الفقر وما راح نسوي قارش وارش بالأهوار.         

الأبراج وتفسير الأحلام

المتواجدون حاليا

518 زائر، ولايوجد أعضاء داخل الموقع

تابعونا على الفيس بوك