الگاردينيا - مجلة ثقافية عامة - حچاية التنگال ٢٢

حچاية التنگال ٢٢

                                     

                           د.سعد العبيدي
لو حاولنه نگعد گعدة عرب.
لاعوفوها گعدة العرب متوكل خبز.

وحاولنه بهاي الگعده نگلب صفحات التاريخ صفحة صفحة، مثل جسبات العبد، راح انشوف إحنا العراقيين من يومنا وسبع تيامنا أبد ما رضينه على نفسنا، ولا على القريبين من عدنا، ولا على حاكم حكمنه. وما أريد نبدي بالتگليب من فاجعة الحسين (ع) بكربلاء، لأن الحچي بيها راح يزعل هواي من اللطامه واحنا ما بينه حيل زعلهم.
واذا ما بدينه من يوم تأسيس الدولة العراقية الجديدة عام ١٩٢١، راح انشوف أجدادنا الله يرحمهم بقوا يجرون بالطول وبالعرض، ما راضين على كل واحد يطرحون اسمه حتى يصير ملك. وتاليها تدخل أبو ناجي الي چان الأبي، وجابلنه المرحوم فيصل، سني كيّفوا عليه السنه، ومن نسل آل البيت خربوا عليه الشيعه، وبايعناه برمشة عين. بعدين سووينه ثوره على الملكية، قتلنه الملك وعائلته وسحلنا حكومته بطريقه ما واحد يرضاها لعدوه.
واجانه عبد الكريم قاسم، ردحناله ردح عينكم لا شافت، وفوگاها تخيلنه صورته بالقمر، خمس اسنين وعدمناه بليله سودة، وتاليها المرحوم ما حصل على قبر مثل باقي المسلمين.
وما أگللكم على صدام، خو تذكروه زين، ما ضل شيخ ما رگصله، ولا عسكري ما شمر بيريته ودبچله، ولا فنان ما رسمه، ولا شاعر ما شعرلهَ. وفوگاها دزيناله تمثال للفضاء وتاليها سحلنا تمثاله وعدمناه بمصباح عيد.
وعلى هاي الرنة، ما رضينه على أحد ابداً. والي انصفگله اليوم، نِطعّنهَ بخنجر ثاني يوم.
عاد هسه تعتقدون راح نرضى على ترشيحات العبادي لوزارته الجديده؟. هاي بعيده.
يرحم أبوكم اصفنوا زين راح تشوفون المشامرْ بالحچي والرفض وطرح مشاريع جديده بدت تطلع ليگدام.
ومن حقكم وحقنا نسأل هاي الصفه اللازگه بينا ليش؟.
وحتى نلگه من يجاوبنا ليش، لازم نشوف واحد يضرب بالتخت رمل، لأن هو الوحيد الي يصفط حچي ونرضى على حچيه حتى لو چان طبخ حصو.   

الأبراج وتفسير الأحلام

المتواجدون حاليا

596 زائر، ولايوجد أعضاء داخل الموقع