فاصل ونعود

التفاصيل

تم إنشاءه بتاريخ الأحد, 06 أيلول/سبتمبر 2015 11:38

كتب بواسطة: حذام الحداد

حذام الحداد

 فاصل ونعود

حكومة دبش هاي آخر العنگود

حيتان ولفتْ للبلد عالفرهود

اشنابك ياعراقي وعالنفط محسود

اذا كل الجنيته بس الوعود


فاصل ونعود

مجلس نوّاب البلد بيهم مثل ينگال

كلمن منصبه مفصّل عليه تفصال

ثرد الحچي للجوعان موّال

الچذب مصفطه والصدگ ماموجود


فاصل ونعود


أمانة عاصمة ياناس بلشَهْ

نفس الرصيف تعمرَهْ وتالي تفلشَه

والمجاري مطوّفَه وابن العمشه

يگلك تنصلح لما الأمان يعود



فاصل ونعود


  تعليم المدارس محَّد ينكره

عن درسَه الولد ماعنده كل فكره

عشر سنين مايعرف سطر يقْره

والاملاء مابي حرف صح موجود

فاصل ونعود
 
عالقضاء أبد مانفتح السيره

راعيّه هبل ماعنده قطرة غيره

أستاذ الفساد وراس تدبيره

وبوجه المواطن بابه  مسدود


فاصل ونعود


وزارة كهربه اشعارهه الفانوس

حكمت عالعراقي ايعيش متعوس

 وابو الگيزر شغلته يلفط فلوس

اجيوبه انملت ودخله ماله حدود

فاصل ونعود  


دواعش الحكم باگو الآثار

وسلمو للعدو الموصل والانبار

وزرعو الفتن مابين الاخيار

حريمه تكاتلوأهل الكرم والجود


فاصل ونعود

اشنقبض من بلد بي ريّه وسكينه

وملالي تبوگنه وحرامي حامينه

فگرَو الشعب  لعبو  لعب بينه

لازم للزبل نردهم ردود