بالفيديو / حمدان البغدادي يحل ضيفا على البرلمان الهندي ..

                                           

                            بقلم:جلال چرمگا

                     

حمدان البغدادي يحل ضيفا على البرلمان الهندي .. موثق بـ / فلم فيديو !*

   
                 

بعد أسبوعين من السفر الى الهند وذلك بدعوة من سكرتارية ألأعلام في البرلمان الهندي وتحديدا من صديقه الهندي عضو البرلمان ورئيس اللجنة ألأعلامية ( شامي كابور) و لغرض تغطية الدورة الربيعية لبرلمانهم .. حاله حال صحفيوا العالم !! . .. علمت بعودته الى أرض الوطن !!.
في الحقيقة والواقع كان ألأسبوعين بمثابة سنتين لابل أكثر..أفتقدته وأصبحت لا أطيق الوضع من دونه !!.. لم لاء ؟؟ وهو صديق العمر والوحيد الذي ظلت علاقاتنا كما هي في السراء والضراء .. نعم فقدت أكثر ألأصدقاء..أما أستشهدوا بتفجيرات وأغتيالات المجرمون القتلة أعداء العراق وأما بقدرة قادر أصبحوا من أصحاب الوظائف العليا أو الملايين من الدولارات!!.. فكيف يتذكرونني ؟؟؟؟ .. لم يبقى لي إلا هذا الصديق الصدوق ... نعم أنه ألأنسان الوفي بمعنى الكلمة / حمدان البغدادي .
رأيته من بعيد بحالة يرثى له... نعم أنه هو.. ولكن وضعه سىء ، يمشي وكأنه في العقد التاسع من عمره.. وضع قبعة ( مكسيكية) مصنوعة من القش على رأسه بحيث غطى نصف وجهه .. ذراعه أصيب بسؤ، مربوط بقطعة قماش وحمله الى ألأعلى برقبته !!.. ياااه لهذه الحالة !!.
أقتربت أكثر... نعم أنه / حمدان بلحمه ودمه .. يا للهول.. أكيد تعرض الى حادث وعلى ألأكثر حادثة أنقلاب أو أصطدام سيارة .. أو لربما محاولة أغتيال !!!.
                                      

ـ حمدااااان.. سلامااات .. على بختك .. هاي شنو؟؟ شجرالك ؟؟.
+ أسكت وخليها.. ربك نجاني وإلا كان أنتهيت وأندفنت بالهند !!.
ـ حمدان... أحچيلي بسرعة.. بس لاء.. خلي نوصل للگهوة وأحچيلي كل التفاصيل !!.
+ مو مشكلة.. أسمع :
تعرف أني رحت بدعوة من الصديق العزيز والبرلماني / شامي كابور..
ـ حمدان .. هيواشك .. رحمة على هذولاك.. هذا صاحبك( شامي كابور) مو كان ممثل وبطل فلم / سنكَام الشهير؟؟؟.. زين شجابه عالسياسة والبرلمان؟؟.
+ أي هو.. نعني الرجل مشهور بالهند وأنتخبوا عضو من خلال الحزب اللي ينتمي الهم واللي أسمه حزب (مهيماران نهتور تشن ) .. نعني حزب / التقدم والرقي !! وهذا الحزب يناضل من أجل القضاء على العادات السيئة والبالية وأعطاء العالم الوجه الناصع والحقيقي للشعب والمجتمع الهندي .. وهو مو بس عضو.. لاء رئيس كتلة ورئيس لجنة كبيرة !!.
ـ أحجيلي المشكلة.
+ خوش.. أني من وصلت الى مطار / نيودلهي.. أستقبلني ( شامي كابور) وبالأحضان .. فد أستقبال حار كلش .. أخذنا تاكسي وكبل للبيت.. ردت عالجت.. يامعود أنزل أبفندق .. عاند وكَال:
نهينا.. نهينا.. أوتيل نيررر....

  

المهم.. قام بالواجب.. وثاني يوم.. جاب البايسكل( دراجة هوائية أم ثلاثة چروخ يشتغل بيها نفرات بعد الدوام) مالته وركبني ويا وحملت حقيبته وحقيبتي و( لفتين عمبة وبيض ) !!! وأتجهنا الى البرلمان !!... و..
ـ هيواااااااااااش.. يامصخم .. يا بايسكل أم ثلاثة چروخ؟؟ يا بطيخ؟؟ .. يا حقائب؟؟؟ هو موعضو برلمان ؟؟ يا عمبة وبيض ؟؟؟... لعد الحماية شنهو شغلهم ..؟؟؟ ... وثم لعد مو عدهم كافتريا ومطعم خمس نجوم مثل جماعة / المنطقة الخضراء ؟؟؟؟. .. وهذا أكيد عضو برلمان عموم الهند ؟؟؟.
+ أكيد عضو برلمان الهند عموما !.
ـ ويركب / بايسكل أم ثلاثة چروخ؟؟؟
+ ليش لاء ؟؟؟.
ـ لعد وين سياراته مالة / الدفع الرباعي ؟؟ الحماية؟؟؟ الشبحات والسوبرات والعفريتات.. وسيارة النجدة ليكَدام.. ويط .. ويط ..ويط .. وخروا.. وخروا .....أفسحوا المجال أجه السيد النائب؟؟.
+ أخوية أنت غير قديم ؟؟؟ هذه بس بالعراق.. أما بالدول اللي بيها ديمقراطية حقيقية ومابيها حرامية وتكتلات وطائفية.. وين أكو هيج كلام ؟؟؟ .. يادفع رباعي؟؟ يا شبح؟؟ .. يا حماية؟؟؟ الله وكيلك الدراجة مالته يمكن مالة قبل عشر سنوات.. أنت شدتحجي!!؟؟.
ـ لعد وين يودي الملايين من رواتبه..؟؟ أكيد صاحبك بخيل .. تعذرني بس هذه حقيقة ومايرادله روحة للقاضي.. هذيچيه !!... رواتبة بالملايين ويركب بايسكل عتيك؟؟.. لاء عيب!!.
+ أخوية... تاج راسي.. عيوني .. أنت تتوقع كل برلمانات العالم مثل برلمان ألأحزاب العراقية؟؟..أغاتي البرلمان الهندي ..أقصد العضو هناك راتبة يادوب تكفي المعيشة!! هُم جايين يخدمون الشعب لو ينهبون ثروات الشعب ؟؟؟.. هساع أفتهمت؟؟.
ـ أي.. بس دخت... كمل .
+ وصلنا البرلمان .. صعدني فوك الى المكان المخصص للصحفيين ورجال ألأعلام.. وهو نزل للقاعة.. بدت الجلسة.. وبالأستراحة نزلت ورحنا شربنا / جاي بالفلفل وية اللفات ..!!.
ـ چاي .. وبالفلفل ؟؟؟.
+ چاي يخبل .. كافتريا بسيطة وكراسي عادي وكل واحد يخدم نفسه.
ـ يعني مو ...؟؟
+ لا أغااااااتي مو مثل كافتريا البرلمان العراقي خمس نجوم !!.
ـ زين كمل..
+ بعد ألأستراحة بدت الجلسة.. أثاري واحد من جماعة ( شامي كابور) .. نعني اللي ينتمي الى نفس الحزب ..حزب (مهيماران نهتور تشن ).. أنتقد وجود ألأبقار بالشوارع وأعتبرها شىء غير حضاري .. بعده ماكمل بدأ الصراخ والعويل من جانب حزب ألأكثرية اللي يعبدون ألأبقار،حزب( مهنام تر مانكَاااااه) .. شوية شوية والصراخ يزداد لاوالله صار رشق بالدفاتر.. وبعدين صار هجوم جماعي عالجماعة .. بس شلون هجوم ؟؟؟ .
صاحبي المسكين( شامي كابور) ختل جوه الميز حتى يبتعد من الضربات.. هجموا عليه ونعنعوا ضلوعه.. أني هم ماكذبت خبر.. نزلت ركض وحاولت مساعدته وأفزعله .. وعينك ماشافت:
عافوا صاحبي ..الكل أنداروا علي ... نعني يمكن فد عشر مرات طرت بالهوا !!! .. بوكسات.. ركلات.. كلات.. چلاليق أبفلس .. ماخلوا مكان بجسمي صاحي إلا أن فقدت الوعي .. بعدها لكيت نفسي بالمستشفى .. بعد أسبوعين من العلاج رجعت.. طبعا ضيعت الكاميرا والجنطة وألأكو والماكو .. راجعت سفارتنا سألوني : أنت بيا حزب؟؟ .. بالله شتحجي وياهم ؟؟ أني بيا حال ؟؟ سولي / جواز لسفرة واحدة .. خلف الله عليهم ... المهم أجتي سليمة ..... هذه هي القصة !!.
ـ حمدان.. لعد وين الشرطة ؟؟ الحماية ؟؟؟... رجال ألأمن ؟؟؟.
+ أخوية أنت تحجي تسعة بالشهر.. ياحماية؟؟ موكنالك ماكو حماية.. أما شرطة ؟؟ فشرطي واحد واكف بالباب الرئيسي.. لما خابروا وأجتي الشرطة وألأسعاف خلولك القاعة خراب .. ماخلوا لا كراسي ولا مايكروفونات كلها شلعوها ..أني وجماعة صديقي / شامي كابور.. أنضربنا بالقاضية!!( ملاعين الوالدين واحدهم جانه كوريانكو اللي صارع عدنان القيسي!!) .. واحدنا لو تعدله للألف مايكَوم.. شيكوم وهو كله جروح وكدمات وكسور من اللي مايخافون من الله ، جماعة / عبدة ألأبقار؟؟ .. حزب ( مهنام ترر منكَاااه ) .. والمهم أكو صحفي أمصور المشاجرة من ألالف الى الياء... بعدين أنشوفها... أخذ الرابط وياك وشوفها بالبيت.. ياااه شلون مشكلة عويصة ؟؟ الله لايراوكياه..
ـ زين وصاحبك أبو أغنية / هاجا .. هاجا .. بفلم سنكام..أقصد / شامي كابور .. وين صار؟؟.
+ يامعود هذاك سووا وجه خريطة الهند + كشمير .. والله يمكن ثلاثة أشهر لازم يتعالج.. ماخلوا مكان بجسمه صاحي !!...للأسف مالحكت أشوف أستجواب / وزير التجارة الخارجية.. لكون الفقرة التالية كانت أستجواب الوزير .. لو تعرف على شنو فلا تصدك .. بأختصار الوزير نعني / وزير التجارة الخارجية الهندي كان رايح أيفاد الى المانيا على أساس يبقى أسبوع .. بس يمكن عجبه الوضع بقى يومين زيادة أكثر من مدة ألأيفاد.. گلبوا الدنيا شلون يصرف خمس آلآف روبية زيادة عن المبلغ المخصص ؟... دتعالوا وشوفوا.. وأحنا وزارة التجارة مالتنا {الله لاينطيهم وأحزابهم بالدنيا وألأخرة} بالتأكيد ( وزارة ألأحزاب مو الشعب!!).. تسرق ( الجمل بما حمل!!) ولا كأنما!!!... نعني فراش الوزير لو يسرق مئات آلآف يكَولوله ـ هني ومري ـ !! أكيد لعد هو مو فراش معالي الوزير؟؟ !!...لعد المدراء العامين شيسرقوووون؟؟؟.
ـ عمي هذوله ( الهنود) عدهم حكومة من صدك.. عدهم ناس مخلصين قابل مثل جماعتنا / جماعة طكَ عطية وشلح وأعبر ولادير بال !!؟؟... بس فعلا الله نجاك.. موكتلك لاتروح .. يعني إلا البرلمان الهندي ؟؟.
+ كلامك على راسي .. نعني لو عدنا برلمان حقيقي عليش أروح للهند ؟؟؟؟ . .. المهم خلينا
أنشاهد الفلم ومصيبة حمدان في الهند:

https://www.youtube.com/watch?v=qNAEDevjwB8

*المقالة ليست بجديدة سبق وان نشرت في موقع/ مجالس حمدان الثقافية عام 2009

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1207 زائر، ولايوجد أعضاء داخل الموقع