لو يعدموني مثل زلخا أباب الشرجي أظل أگول الحق و ما أخاف /٣

التفاصيل

تم إنشاءه بتاريخ الثلاثاء, 14 نيسان/أبريل 2026 11:24

كتب بواسطة: أبو حمودي البغدادي

أبو حمودي البغدادي

لو يعدموني مثل زلخا أباب الشرجي أظل أگول الحق و ما أخاف /٣

-الله بالخير أبو حمودي..شكو أشو اليوم تضحك؟؟؟
ما أفتهمنا ، أصير عصبي تتعجبون ، أضحك نفس الشي.. أرحموني وذبحوني على قبلة..
-عمي بس لا تصير عصبي شتسوي سوي ليگدام شتشرب على حسابي بس گولنه شكو؟؟
بصراحة البارحة للصبح ما نمت بس أفكر.
-بيش تفكر؟؟
نعني بيش أفكر؟؟ غير بوضع وطننا اللي الحرامية امسيطرين على كل الأمور من الف لعنة على بوش و بريمر والبقية اللي قدموا العراق على طبق من ذهب للحرامية و الجواسيس وتاليها تمردوا عليها و ليل ونهار گال الشيطان الأكبر و راح الشيطان الأكبر.
-هذا يعني ما عاجبك؟؟
لا والله حيل عاجبني ونص بأسهم بينهم واحنة ياهو مالتنة فلم ابلاش نتفرج ونضحك للأخير عساهم نارهم تاكل حطبهم...المهم البارحة وجه الصبح قررت قرار مهم جدا!!.
-خير ان شاء الله!.
قررت أفتح دكان..!!
-يادكان رحمة على ذاك الأب؟؟.
مو دكان ددكان..
-لعد شنو؟؟
دكان سياسة
-هاي اول مرة اسمع بهالمصطلح!!
غريبة..اخوية دكان مثل دكاكين الجماعة.. سريا السلام و حزب الله و كتائب فلان وفلتان.. والله وراح تشوف شلون أنجح!!.
-ابو حمودي ترة دخت.. نورنا أكثر..
الشغلة وبعد دراسة و روح و تعال شفتها اسهل من السهل.
-رحمة على والديك هذه يرادلها أمكانية مادية وناس و تجمعات .. وو...!.
ابدا رأس مال ماكو داعي، وناس واجتماعات ماكو أسهل منها.. ناس سذج بالأف فقط المطلوب:
اسويلي شجرة حسب ونسب
كم محبس بأصابعي
عباية خفيفة
سبحة ١٠١
لحية خفيفة
شعارات رنانة و كم لقاء تلفزيوني
وابوك الله يرحمه
-بس هذه ضحك عاعالم.
أكيد وجنابك شتتوقع من اللي عدهم دكاكين سياسة من چبيرهم الى صغيرهم ، وداعتك كلها يك حساب 98 % منهم لا حسب ولا نسب و تقشمر وضحك على الناس الغلابة و مثل ما تشوفون.
-دوختني أبو حمودي، من جهة انت على حق ومن جهة أخرى ما أصدك تسويها كودن أنت ابن حمولة وعراقي أصيل ، شلون تضحك عالناس السذج با لأخص الشباب اللي عطالة بطالة و مستعدين على مود كم الف دينار يذبون ارواحهم بالنار!!.
وانت صدگت؟؟
-لا والله ابدا اعرفك أصيل وابن اصول و ما تمشي الا وية الحق.
على بختك والله العظيم ما يصح الا الصحيح وهذولة اللي تشوفوهم حاليا اللي عايشين بمال الحرام يجي يوم وكلهم بمزبلة التاريخ وعن قريب.
-تسلم ابو حمودي يا عارقي يا أصيل.. اللهم أحفظ العراق و شعب العراق..
آمين يارب العالمين.. چاي لأبو حمودي الورد و من راس القوري..

لاوالله اليوم عاجبني أشرب حامض..