حچاية التنگال ٨٦

                                           

                                                             د.سعد العبيدي

حچاية التنگال ٨٦

لو اخوتنهَ الخليجيين الله يحفظهم ويطولْ بعمرهم مضَبْطِينْ شغلهم وعايشين مثل غيرهم بالعالم المتَحضّرْ چان گلنهَ بهاي الأيام السودة عين وصابتهم.
لكن الي صار بيهم والي دا يصير بيناتهم مو حسبة عينْ. هيچي نتايج تجي طبيعيه لمجتمعات بيها الحاكم ضل الله في أرضه، كلشي يسوي بكيفهَ، ومَحدْ يگله على عينك حاجب. الناس والموارد والخيرات والآراء والأفكار مسجله باسمه طابو. والشعب خو ساكت عن الغلط ومتونس على جوع أخوته وولد عمه وجيرانه، وكلمن يگول يا روحي.
تگللهم يابه يمعودين ليش تمكّنون الارهاب علينا مو ذبحنهَ، يگللولك تستاهلون لأنكم من غير طائفه.
ليش تساعدون الأجنبي يجَوّعنهَ ويذِلنهَ مو ملينهَ، والدنيا دوارهَ، ترهَ يِجيْ يوم ويذلكمْ، يغَلسُونْ ولا چنهم يدرون.
يا بالله عليكم، يا أهل الرحمْ، تره اسرائيل هي المستفيدهَ ودا تلعب بينه طوبه ويجي يوم تلعبْ بيكمْ مِثل ما لعبت بينهَ وأكثرْ، يردون ويگولون شعلينهَ بيها خَلِي تسوي الي تسويه.
وبرمشة عين وقدرة قادر إجهَ هذا اليوم مع الأسفْ، ولَنّهُمْ ينضربون على روسهم بدونكيات وَرّمَتْها وسَوّتْ بيه كل عنجرّه إشكبرها.
لكن تعتقدون يصحونْ على زمانهم، لو يبقون مثلنا نايمين ورجليهم بالشمس.
أعتقد يا جماعة الخير بهذا الزمن التعسْ ماكو لا واحد من عدنهَ ولا من عدهمْ ولا من العرب راح يصحى من نومته. خو چان صحوا أجدادنا بالاندلس، ومثل ما ذولاك ضيعوا حضارتهم اهناك، إحنه هم راح انضيعها إهنا، والي يجي بعدنا هم راح يگول حرامات، ومن جهلنه وفينة حضنه راح نبقى نگول إحنه أهل الحضاره عشر تالاف سنهَ.

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1000 زائر، ولايوجد أعضاء داخل الموقع