الگاردينيا - مجلة ثقافية عامة - حچاية التنگال ٥٦

حچاية التنگال ٥٦

                                                        

                               د.سعد العبيدي

تگله خوية ليش تسوي هيج شي؟ يگلك يمعود انت شعليك.
لعد لمن واحد يطلع عن الطريق لو يظلم أحد مسكين معقوله آني معليه وذاك معليه.
واذا كلنا معلينهَ بعدين تصير هوسهَ والظلم يعم، مثل ما صارت وية أخونه كامل.
كامل يگول اجيت أزور صديقي عبود لمعمله بحي جميله.

خابرته بعد ما طلعت من البيت، گتله جاي أشوفك، گال أنتظرني جايك هسه بالطريق.
گعدت أشرب چاي وما اسمع غير حس العياط، كل الگاعدين گاموا وآني هم گمت وياهم، والكل تسأل ولكم شَكُو.
وطبينه بنص الضَغبَرهَ لن ثلاث عمال عراقيين واگعين دگ لعامل بنغالي، وخطيه جوه اديهم صاير جريذي وطبعاً وياها فشاير (أخ الگ....ـه) (أنعل أبوك لبو عشيرتك مو راح تگطع رزقنه).
كامل صار حاجوز ويصيّحْ ولكم عوفوه لو عنده عشيره ما چان تحارشتوا بيه، مو هذا غريب اشلون يگطع رزقكم؟.
رد عليه واحد منهم چان مثل الثور الهايج ورواويله تكت وگال:
منعول الوالدين من يجي للشغل الساعه سبعه الصبح وللأربعه العصر ميوگف بس يشتغل لا يچل ولا يمل مثل مكوك الحايچ، خايب ما تتعب، ما تصخن، ما يصيبك حريشي، شنو انت، مكينه خوما مكينه.
گللهم كامل وين الغلط متخلوه يشتغل.
جاوب الثاني اشلون مو غلط مو راح يعم علينا، احنا كلنا ما نگدر نجاريه.
رجع سألهم عجب مو انتم هم شباب وبعمره؟.
جاوبه الثالث وبثقه چبيره:
اشجاريلنه نصير مثل هذا إلزَوُجْ، ليش ما عدنه عقل.
وگال المقاتل الرابع:
والله ما راح نعوفه الا يعوف الشغل.
گلولي شتحطلها وتطيب؟.         

الأبراج وتفسير الأحلام

المتواجدون حاليا

632 زائر، ولايوجد أعضاء داخل الموقع