الگاردينيا - مجلة ثقافية عامة - جماعة المنطقة الخضراء و شمسية الحاج أحمد!!

جماعة المنطقة الخضراء و شمسية الحاج أحمد!!

  

جماعة المنطقة الخضراء و شمسية الحاج أحمد!!

المكان :مدينة السليمانية
الزمان:نهاية الستينيات من القرن الماضي

  

الدنيا تغيرت من كل النواحي من البشر و الشجر و المناخ الى أبسط الأمور ..
أيام زمان كان الشتاء شتاء بمعنى الكلمة برد و أمطار و ثلوج ورياح و چان لازم الناس تتهيأ وتخزن كثير من المواد لأستقبال هذا الفصل..
كان الحاج أحمد صاحب دكان في وسط المدينة وكل سنة گبل قدوم الشتاء چان يروح على شمسيته ويفحصها أخاف بيها عطل أو كسر حتى يوديها الى أسطة كريم لتصليحها..
وأسطة كريم كان المصلح الوحيد للشمسيات وچان مرخص لتصليح الأسلحة النارية في نفس الوقت!!.
هذيچ السنة كالعادة راح طلع الشمسية وشاف سيم من السيامة مگطوعة وهذا يعني لازم يودها الى اسطة كريم حتى يبدل السيم ويشوفه اذا كانت صالحة لو لاء؟؟.
أخذالشمسية وسلمها للأسطة والأخير واعده أن يخلصها بعد فترة وطمأنه وگاله :
لادير بال گبل سقوط قطرة مطر الشمسية تكون جاهزة!!.
راحت أيام وأجت أيام وهناك تذكر الحاج أحمد شمسيته وراح گبل للأسطة كريم فكان رد الأسطة أنه يعتذر وأنشغل بلكد يجي بعد كم يوم!!.
أنقهر الحاج من هالتصرف لكون المعروف عن الأسطة كريم انه مضبوط بشغله و بمواعيده مع ذلك خلي ينتظر والله كريم.
بعد أسبوع مر عليه و تلقى نفس الجواب!!.
الفار گام يلعب بعب الحاج وگال وية نفسه:
- ما معقولة لازم أكو شىء!؟!
ظل النهار كله يفكر ويفكر وماگدر يضم الحچاية على جيرانه (صديق البقال) اللي واعده أن يروح بنفسه الى أسطة كريم ويفتهم منه شنهو المشكلة!!.
ثاني يوم صديق البقال وبعد صلاة الظهر رأسا راح الى محل أسطة كريم وگعد يستفسر عن شمسية الحاج!!.
من أول دقيقة أعترف الأسطة بأنه خجلان كلش ويه الحاج أحمد لكون الشمسية أنكسرت بيده و ماتصلحت!!.
والمشكة (الكلام لأسطة كريم) انه بالمدينة ماكو مثل هالشمسية لكونها أنگليزية و تكمة وماركة معروفة ودينتظر بلكي واحد عرف يروح البغداد ويشتريلة وحدة ويسلمها للحاج!!.
رجع صديق البقال الى الحاج أحمد وحچالة السالفة ومابيها.. وهنا طلب الأخير من جيرانه أن يروحون سويا الى أسطة كريم ويعاتبوا!!:
- على بختك أسطة الف شمسية فدوة الك وأني جاي أعتذر منك على الحاحي والله أنقهرت هواية وأحنة أخوان وعشرة عمر .. لا على بختك أسطة وأني شلون أقبل تشتريللي شمسية جديدة؟؟!!.
تغيرت الحالة والجو صار ضحك و وغيروا الموضوع  بس الأسطة كان عنده كلام وگال:
- ياجماعة أني أسطة والي سمعتي بالحقيقة كنت أستحي أگول ياجماعة ترة أني بورطة..ماصايرة أني أشهر أسطة بالمدينة والناس تحترمني و تحترم مهنتي وهسة تريدوني أعترف بأنه مادبرت أصلح شمسية؟؟؟.
رباط السالفة:
أمريكا (الله يلعنها بالدنيا وألأخرة) رادت تكحلها عمتها.. رادت تنشر الرفاهية والديمقراطية المزيفة والرخاء بين الشعب العراقي والنتيجة مثل ما داتشوفون الحرامية بيناتهم صايرة لخة ورشق بالقنادر تحت قبة البرلمان والكل ولا جماعة راضية عن البقية!!.
لذلك أنشوف أمريكا ساكتة ولا كلام!!.
ماكو دولة بالعالم ماتدخلت بشؤون العراق وما شكلت ميليشيات لحسابها والعراق من سيىء الى الأسوأ.
الف رحمة على روحك يا أسطة كريم لشجاعتك و أعترافك..
الف لعنةعلى أمريكا بالرغم من فشلها ماتريد أن تعترف.. وما نعرف شلون تاليتها؟؟.
الجماعة عافوا الحرامية الكبار والمجرمين و الجواسيس أنداروا على رئيس البرلمان ويريدون يزيحوا!!.
طيب والمن راح تخلون؟؟؟؟؟..أني أگول خلوا الزوج السابق للغجرية ساجدة عبيد للأسف نسيت أسمه بس هو عضو بالبرلمان الحالي!!.
مبروك أيها العراقيين.. شراح أنشوف بعد؟... محد يعرف غير سفير أكبر سفارة بالعالم داخل المنطقة الخضراء.. طبعا هم نسيت أسمها!!!!!.
أودعناكم أغاتي ..

رئيس التحرير

إذاعة وتلفزيون‏



الأبراج وتفسير الأحلام

المتواجدون حاليا

596 زائر، ولايوجد أعضاء داخل الموقع