لو يعدموني مثل زلخا أباب الشرجي أظل أگول الحق و ما أخاف/٢٠

التفاصيل

تم إنشاءه بتاريخ الخميس, 24 أيلول/سبتمبر 2026 19:48

كتب بواسطة: أبو حمودي البغدادي

أبو حمودي البغدادي

لو يعدموني مثل زلخا أباب الشرجي أظل أگول الحق و ما أخاف/٢٠

-خير ان شاءالله أبو حمودي أشو صافن؟؟

ايوالله ضايج وروحي طالعة.
- خير ان شاءالله؟؟.
يامعود من أتذكر زمن الماضي الجميل أريد أنفجر من القهر.
- من يا ناحية؟؟
كل النواحي أبسطها مسألة كرة القدم.
-شبيهة الكورة؟؟.
سودة وأمصخمة.. انت شفت المنتخب ويه سلطنة عُمان؟؟
- طبعا.
ورأيك بالفريق.
-مثل أي نادي درجة ثالثة
خو گول رابعة لو خامسة مو أحسن؟؟
-يعني شوية راعيتهم.
عمي يافريق وكيلك الله مخازي يحملون أسم العراق.. أيام زمان كانت أوضاع اللواعيب لاشىء و كل الفرق بالعالم يحسبون الف حساب للمنتخب العراقي.
كانت أكو فرق مستواها أحسن من منتخب هالأيام بعشرات المرات:
الفرقة الثالثة و الأليات و المصلحة .. الخ كانوا رفعة راس..
اليوم عشرات الأمتيازات و مدرب أجنبي و ملاعب ممتازة ومستواهم صفر!!.

معقولة ننسى:عمو بابا ويورا و جبار رشك وصاحب خزعل وجمولي و حسين سعيد و عدنان درجال و أحمد راضي و فلاح حسن و حامد فوزي و رعد حمودي و العشرات.. اليوم أنطيني اي لاعب يحمل صفات ومهارات هذولاك؟؟ أكيد ماكو.
- والحل؟؟؟.
الحل برأي ماكو غير حل واحد.
-گولها..
يحلون اتحاد الكرة ويبدون من جديد ويعتمدون على فرق المحافظات والأندية ومدرب عراقي بلاكد بشرط أن ما يدخلون أية منافسة لحد ما يتحسنون!.
- معقولة؟؟
طبعا ليش لاء ،لعد تقبلها يدخلون منافسات باهالمستوى المخزي؟؟
-اكيد لاء.... وانت ستقترح؟؟
مايرادلها روحة للقاضي ، بأختصار:
كافي تهينون الكرة العراقية وكافي تلاعب بمشاعر جماهير الكرة..
- كلامك على راسي.. تعال ياولد جايات وحامض لأبو حمودي!.