لو يعدموني مثل زلخا أباب الشرجي أظل أگول الحق و ما أخاف /٦

التفاصيل

تم إنشاءه بتاريخ الجمعة, 08 أيار 2026 12:15

كتب بواسطة: أبو حمودي البغدادي

- ابو حمودي أشو گاعد بوحدك ماتجي نلعبنا داس طاوالي.

خليني بدردي لا طاولي ولا دومنة!.

- خير ان شاء الله.

بصاية حكومة المنطقة الخضراء ليش اكو راحة بال؟؟.

- والجديد؟؟؟.

نعني هذولي فلا يستحون ، يا أخي ما يحترمون حتى قراراتهم، طيب انت من ماعندك سلطة على الحرامية والقتلة عليش تصدر قرار بتوقيفهم؟؟.

- منو هذولة؟؟ رؤساء الأحزاب؟؟.

لايابة لاء.

- وزراء واعضاء برلمان؟؟

لا عيوني لاء.

- دأحچيه يا أبو حمودي خلي نعرف منو والمن تقصد؟؟.

هم كلش هواية لكن راح تتفاجأون.

- گوووول رحمة على ابوك.

كلكم سامعين بالقاتل المعتوه أبو درع.

- أكيد.

هذا افرار من الجندية بوكتها وكان يبيع سمج زوري بسوگ العورة بمدينة صدام والأن ( مدينة الصدر)، كان يطفر من سطح الى سطع والأنضباطية تركض ورا..

بعد الأحتلال أنظم الى جماعة مقتدى الصدر ، سجله مليان بجرائم القتل والسلب و التعدي على املاك وسيارات المواطنين وحتى الحكومة التعبانة.

هذا كان يجيب سيارة اسعاف بمساعدة ( حاكم الزاملي) من نفس الجماعة وهو كان وكيل وزير الصحة ، يجي لمناطق معينة ويدعي أن هناك جرحى محتاجين دم بس صعد كم واحد فورا الى خلف السدة يقتلهم بدم بارد وهناك شفل ويندفنون ولا من شاف ولا من درى!!.

وعشرات لابل مئات الجرائم الأخرى ابسطها استيلاء على السيارات الحكومية منها سيارات الشرطة وألأف القطع من الأسلحة المتوسطة وحتى الثقيلة!!.

لسنوات ومحد يگدر يگوله على عيونك حواجب ، بعدين طفح الكيل وتحركت وزارة الداخلية وصدروا أمر بالقاء القبض عليه .

- وتالي اعتقلوا؟؟؟.

اخوية انت تحچي ستة بالشهر، أكو .... يعتقله، بس صدر الأمر والمئات من العتاكة شكلوا حلقات داير مداير بيته واكو ناس تهدد والأخرين يقرون قصائد كلها تمجد الحاج أبو درع قدس الله سره وبارك بأعماله و ينصره على الكافرين وروح و طززز بالحكومة وبقرار القبض خلي ينگعوها بالماي ويشربوها..

- عجيبه!!

https://www.youtube.com/shorts/ScYV8ziBeno

لا والأعجب انه البارحة تحدى الحكومة والسلطة القضائية واجه الى ساحة التحرير يعرض عضلاته والمئات من انصاره يركضون ورا سياراته ويهتفون بحياته وانعل أبو الحكومة شحدها تحرك ساكن!!.

- عمي بالله فعلا ماكو حكومة اللي ماتگدر تقلي القبض على هالنماذج!!.

اخوية من أگولكم ولاية بطيخ محد يصدگني!!.

- حقك ابو حمودي والله ماحچيت غير الصدك.. تعال يا ولد حامض وماي لأبو حمودي الورد! .. هذه كلها من بركات بوش الصغير و بريمر!!! والله العظيم فلا نرتاح بظل الجواسيس والحرامية.. النه الله يا خلك الله.