برنامج وجهات نظر، للحواووين !!!!! من مسرحيات الزمان الاغبر !!!...

التفاصيل

تم إنشاءه بتاريخ الأحد, 14 كانون1/ديسمبر 2025 20:57

كتب بواسطة: سيف الدين الألوسي

 سيف الدين الألوسي

برنامج وجهات نظر،للحواووين !!!!! من مسرحيات الزمان الاغبر !!!.

بعد أخذ ورد مع نفسي ،، طلعت ميز بالطرمة وعليه الجرزات والذي منه ، ودعوت الكلب الوفي سيزر والبزونة البذات طروب والططوة فتوح والغراب سيكو والبلبل كوكو الى برنامج وجهات نظر مختلفة للحواوين في قناة اس اف اي !! ولأخذ الاراء المختلفة ومواضيع الساعة من الاضطرابات والارهاب في استراليا والجامعات الأميركية والشرق الأوسط وحروب أوكرانيا وروسيا وتغذيتها من أوروبا وبين تايلند البعيدة الملتهية بالسوالف المكسرة وجارتها واليمن وإيران وفنزويلا وحتى اللي بالگبور ممرتاح حيث يفلشون گبره ويبوگون المرمر !!! وين نوللي !!! ، وقضية الهجرة والتحديات المستقبلية والتي تواجه الحواوين مستقبلا !!!

تصدر الميز سيزر وكعدت بصفه المتصابية طروب ومن ثم الغراب سيكو ضيف الحلقة والططوة المتقاعدة فتوح والبلبل كوكو في اول ظهور علني له !!!
رحبنا بالحضور الكرام واعطينا الكلام للغراب سيكو كونه ضيف الحلقة والاكبر عمرا بين الحواوين !!
قال الاستاذ الغراب سيكو وقد غزا الشيب مفرقه ،، بأنه طيلة عمره الطويل لم يرى هيجي خيط وخرابيط في العالم وفي عالمنا اليوم !!! اما في منطقتنا وبلدنا ،، فصرنا مثل المرحوم عبد الفتاح القصري عندما كان يقول بأن كلمته لا تنزل للارض ابدا ثم يتراجع وهكذا ،، ثم أردف قائلا اني لولا تقدمي بالعمر ولأن عمرنا الطايح حظه انكضه بالثورات والحروب ومن ١٤ تموز الكشرة ،، وحيث كنت اطلع مظاهرات في شبابي على النظام الملكي مع مجموعة من الغربان والبوم ذوي الميول اليسارية والقومية ،، وتالي مفتهمنه شي لا من اليسار ولا من القومية ،، اني لولا عمري چان هسه هجيت وكعدت فوك شجرة باليونان لو باسبانيا انعق بكيفي ،، وبدون خوف وخشية من زوار الفجر السابقين ،،،واللاحقين ،ربنا اخذ امانتك تره زهگنه !!!
البلبل كوكو ، اسم الله عليك عمو سيكو،، احنه شعدنه غيرك ،، عمر الطويل ان شاء الله ،، من تضوج تعال يمي فوك النارنجة اللي بالزوية اغنيلك اغاني مال فريد وادكلك عود !!!
نطت طروب من يمها !!! احنه وكل حواوين الحديقة نحبل نجيب بلياك عمو سيكو !!
سيزر ،، نغ طروب وگاللها اشتغلت اللواگه ، وبعدين شنو عمو سيكو ،، قابل هو هاز كاروكج !!! لوگية من يومج من چنتي تطلعين مسيرات تأييد ايام الحصار !!!
الططوة فتوح ،، اشو همينه گلبتوا البرنامج نگره ،،، فدوة لعينه كوكو أشكد مؤدب طالع على حبي كوكي الله يرحمه جده ،، من چان يدكلي هاو اي لوڤ يو ايام زمان ولو چان شوية احلى من كوكو واطول همينه !!!
طروب كامت تكرز ،، كفخها سيزر وكاللها عيب احنه عل الهوه!!
كلتلهم رح اجيبلكم مشروب اخللي بالمكات حتى ميبين !! الجمهور عبالهم چاي !!
الكل وعلى فد جواب ،، روعة احلى فكرة !!!
عندي ويسكي قديم عبالك سبيرتو دملوك ، وزعته بالمكات وجبته الهم !!!
الغراب سيكو وره اول كمع ،، نغني وگال هذا ويسكي مضروب يمكن مصري!!! بيناتنا الحجي !!
طروب گالت يخبل الشيفاز ،، غمها سيزر وكاللها ، مو انتي همينه رومي شنايدر خبيرة مال ويسكي بت النعال !!
فتوح ،، كالت ،، تزقنبوا وسكتوا بليه لغوة !!
وره ثاني كمع كوكو گام يغني عدت يا يوم مولدي لفريد ،، والكل كامت تعوي ،،
واخذ كمع ونفس جكارة الغراب سيكو وگال ،، تذكرت أصدقائي المرحومين حسن فايق واستيفان روستي وكاميليا !!
فتوح الططوة كامت تبجي على زبلوق رجلها والايام الخوالي !!!
طروب البربوك لازمتها الضحكة على كوكو وسيكو وفتوح كفخها سيزر ،، وكاللها ،، ادبسز ، تربية سز ،، خللي يطلعون الخطار واني اراويج !!
اني شفت البرنامج والضيوف طلعوا عن موضوع الحلقة!!
فاعتذرت من المشاهدين الكرام وكطعت البرنامج والبث على الهوه !!!
بقوا كاعدين وگام يبدع كوكو وشدت وصلة فتوح وكامت ترگص على انغام انت عمري ،،، وتقلد سهير زكي بهذه ليلتي وتتلوه مثلها !!!! وسيكو كام يدك عل الميز وطروب جابت الجمبارات من جوه التيغه وكامت تدك جمبارات وتهز رگبة !!
سيزر ،، صافن وگال عرب وين وطنبورة وين،،طروب لابسه ياخة وتهز رگبه !! واللخ همينه بومه وعدها فقرات وسكر وهيجي تركص ،، لعد لو غزال اشچان سوت !!
ثم تم ختم الجلسة بالبوس والتمطك بين الحواوين !! ،، سيزر يتنكس مسح وجهه بقلونيا مال اسطنبول !!!! وانتهت الجلسة بتشكيل لجنة من الحواوين لمتابعة المشاكل والحروب وتعيين مبعوثين امميين يقترحهم الاستاذ الغراب سيكو لمتابعة الأمور ورفع تقارير لرفعها لابو اللبلبي للاستفادة من ورقها كالعادة ..سيزر الهولندي الأصل گال كالعادة هزي تمر يا نخلة ولو حتى النخل مخلص من ظلم بني ادم وجشعه ... كصكصوه وسووه أبراج سكنية تشبه گبور ستالين .
وترحم على الفيس بريسللي وعبد الستار الطيار .
تحياتي للجميع