حچاية التنگال ١٤

                                                        

                                 د.سعد العبيدي

آني أشوف وأكو وياي من يشوف، لازم بعد ما نحتج على البرلمانيين الي انتخبناهم بحيل صدر، وما ننتقدهم أبداً، وبالعكس أشوف لو نشيلهم على اچتافنه ونفتر بيهم بالشوارع ما راح نوفيهم حگهم، وما قدموه النا من خدمات، حتى أگول بعد مو من حگ أي واحد بالعالم كله، يحچي على برلماننا ويگول خالي من الفطاحل، لو أعضاء منه منحازين، لو ما يداومون، لو عدهم مصالح وفلوسهم بره، لو أكو بيهم بس يريد حكة خشم حتى يطلع يصرح ويحرض على الطائفيه.
گلولي ليش؟.

أگللكم لأن بهاي الفترة الصعبه الي بيها بعد ما نعرف حماها من رجلها، صَوَتولنا على أهم قانونين محتاجيهن بهاي الأيام الگشرة:
أول واحد قانون حجب المواقع الإباحية.
وثاني واحد قانون الضوضاء.
ها، هَمْ بعدكم تريدون تحتجون وتحچون.
حرام عليكم، خو شفتوا بعيونكم الباچر ياكلها الدود إشلون برلمانيينا حايرين بينا حتى لا نشوف مواقع اباحیه بالليل وانام بحسره، واشلون مهتمينن بعقولنا حتى لا تأثر عليها الضوضاء وبعد ما تندل دربها.
وشفتوا اشلون دَيرَضوّن ربهم من صدگ، ويرَيحون ضمايرهم ثالث مثلث.
الحمد لله اشگد انی مرتاح من سدوا المواقع الاباحية الحرام، وگمت أنام رغد، وما أفكر بولدي خاف يسوون مكسرات من يباوعون، ويحملوني ذنوب أروح من وراها للنار.
والحمد لله بعد ما أسأل على باقي القوانين، الي بعد ما إلها فايده، ولا أگول يمعودين استعجلوا بقانون الحرس الوطني، والكسب غير المشروع، والفساد، والاستغلال، ولا غيرها وغيرها. ولا بعد أردد ويه نفسي المثل المشهور: عرب وين طنبورهَ وَين.

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

717 زائر، ولايوجد أعضاء داخل الموقع