حچاية التنگال ٢٤٠٥

                                          

                         د.سعد العبيدي

حچاية التنگال ٢٤٠٥

بس أريد أفتهم، وأكيد أغلب أهل العراق وياي هم يريدون يفتهمون حقيقة (أن البرلمان بالنظام الديمقراطي هو الي يمثل الشعب)، زين لمن يمثل الشعب، وهو منهم وبيهم لعد ليش برلماننا يخاف من الشعب؟
وليش كل ما يريد يجتمع بألف يا علي، يروح يركض للحكومة يشيّمها وهي ما ينرادلها تشييم حتى تسد الجسور والطرق والدرابين، وكل فرع من الفروع، على مود لا يچفت أحد من الشعب على الگن مالته ويخربط عليه الغزل، أو يسحسل أعضاءه ويكشف عوراتهم لو يذبهم بتنكات الزبل؟
ليش ما يتعظون وهمه عود مُنتَخبين من الشعب؟
ليش ما يعيدون حساباتهم ويگولون لنفسهم احنه غلطانين ويصلحون غلطهم مثل خلگ الله الباقين؟
ليش وصلوا نفسهم لهذا الحال مكروهه وجابت بنية؟
وليش المستقل من بيناتهم من يدخل البرلمان يطلع تابع لفد صماخ؟ والمتدين من عدهم بس يعبر عتبة البرلمان يطلع منها حرامي وفاسق ودجال، والحزبي المنتمي لواحد من أحزابهم أول ما يگعد على الكرسي البرلماني وينشنش، ينفش ريشه، يشتغل گزلي من وره حزبه لو ينشق عليه، ويروح يساوم من يدفع أكثر حتى ينتمي اليه؟
ليش ما يسألون نفسهم شنو الي سويناه وصار الشعب الي انتخبنا يكرهنا لهاي الدرجة؟
ليش وليش وهواي هنه الليش، بس تعال فهم الشعب الي يكرههم ويريد يعاقبهم انتخبهم ليش؟

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

742 زائر، ولايوجد أعضاء داخل الموقع