حچاية التنگال ٣٢

                                         

                           د.سعد العبيدي

بأيام گبل لمن تراجع دائرة حكوميه والموظف يغلط بحقك، لو ما يعرف شيسوي تروح على المدير مالته على طول، يگلك إستريح، ومن تحچي وياه تلگاه مضبوط ويفتهم ويحب شغله ودائرته من كل گلبه. تنطيه المعامله يباوع بيها وعلى طول يگل للموظف هذا غلط، سوي هيج هو الصح، والمواطن عنده حق، وبعدها تطلع انت راضي والمدير واثق من نفسه والموظف مقتنع وما حاقد عليك.

بهاي الأيام تراجع معظم دوائر الدولة وتسلم معاملتك للموظف تلگه هواي منهم ما يعرفون الچُك من البُك، وما بيها شي المفروض الما يعرف والجديد على الشغله  يتعلم، لكن أكو قسم لا يريد يتعلمون ولا يقبلون تگللهم  انتوا غلطانين تره مو هذا المطلوب بالمعامله الي جدامكم. واذا چنت جريئ وگلت لو طفرت روحك وگلت هذا غلط تلگه واحدهم يوگف بوجهك ويگول بتنگ:
شنو انت تعلمني؟.
وإذا رحت للمدير وأنصحك لا تروحله، لأن هواي منهم يطلعون أطگع من موظفيهم، مو لأنهم ما يفتهمون وبس، لا، لأنهم ما ينطون بالموظف مالتهم لو يخافون منه، وبس يريدون يچفون شره، ومايهمهم المراجع، واذا واحد منهم صار وطني وراد يتعاطف وياك راح تشوفه يتأفف ويگول:
شسويله، فرضوه عليَ فرض.
وهذا الحچي كله صار وياي گبل سنتين لمن موظف بدائره إنسانيه، بدا يمشخط بكيفه وذب المعامله على صفحه وگال ما اسويها، وچنت أعرف الوزير مالته من أيام الدراسه بالقاهره عام ١٩٧٨، ومن شوطتي شلت التلفون عليه گتله:
أبو .... موظف بوزارتكم بالقسم الفلاني اسمه فلان، يبين مو طبيعي بس يهاجم الناس المراجعين خالي بطال، وحچيتله القصة كامله من طقطق الى سلام عليكم.
كل الي گاله معالي السيد الوزير:
إي والله هذا إمفشلنه ويه الناس!!!
بربكم هذا حجي مال وزير يتحمل مسؤولية ادارة هي تأسست لخدمة المواطن.    

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

982 زائر، ولايوجد أعضاء داخل الموقع