حچاية التنگال ٣١٥١

التفاصيل

تم إنشاءه بتاريخ الثلاثاء, 01 أيلول/سبتمبر 2026 09:07

كتب بواسطة: د.سعد العبيدي

د.سعد العبيدي

حچاية التنگال ٣١٥١

التجاوز على أملاك الدولة وأراضيها مو جديد، عبالك إحنه بطبيعتنا نحب التجاوز، وأكبر عمليات تجاوز صارت ببغداد العاصمة بعد ٢٠٠٣، من ضعفت سلطة الدولة وانشال القبغ، أو بالحقيقة لمن أحزاب السلطة الجديدة، أي القبغ، صارت تتعاطف ويّه المتجاوز، وتسعى الى أن تكسب صوته بالانتخابات، فعافته يتجاوز براحته.
ومع هذا، لو نجي نباوع حجم التجاوز، خاصة بحزام بغداد، من ذيچ السنة لهاي السنة، نشوفه تضاعف بعد دگة داعش ومسك أرض هذا الحزام من قبل قوات الدولة: "جيش، شرطة، رد سريع، طوارئ، حشد"، بعد طرد الإرهاب منها. وهنا السائل يسأل:
اشلون تضاعف التجاوز وكل هاي القوات موجودة؟
محسن مطلع على هذا الموضوع ويتابعه زين، وهو أصلًا من ذيچ المناطق، يحلف يمين ويگول: الفصائل المسلحة الموجودة ضمن هاي القوات، أو أفرادها المتغلغلين بيها، همه أساس التجاوز. ومن أول ما إجوي بدوا يستطلعون ويشوفون الأراضي الزينة؛ إذا مال الدولة، يچيتون عليها ويقسموها ويبيعون بيها ومحد يگللهم لا.
وإذا أملاك صرف للناس، الي هي أصلًا تخاف منهم، فيزحفون عليها، وإذا أحد تجرأ اشويه وطلع صوته، يجيبون مكاينهم بالليل ويجرفون الأشجار بحجة طلع منها رمي. ولمن تمكنوا، بعد حتى الحكومة، وإن چانت حكومتهم، ما تگدرلهم!!