الگاردينيا - مجلة ثقافية عامة - أمس واليوم !!! گبل او امس

أمس واليوم !!! گبل او امس

                                              

                         سيف الدين الألوسي

أمس واليوم !!! گبل او امس

تجيب وياك بطل شيڤاز ريگال ياخذوه بالمطار ،،، على اساس ممنوع دخوله ووره يومين تلكي مدير مخابرات المطار ديلط شيفاز ببيتهم !!!!

تجيب هدوم ماركس اند سبينسر وتشلع الماركة ولانها ماركة لديها هدوم عمرها عمر تفگه من ملابس داخلية وجواريب وبلوزات الخ ،،،، واسعارها مناسبة !!! ياخذها ابو الگمرك كونها ممنوعة من دخول العراق ، وثاني يوم تلگي لابسها ، ولازك عليها علامة صنع في سوريا !!!!
من تريد تسافر تاخذ كتاب من الكلية يؤيد استمرارك بالدراسة وتروح للتجنيد والتجنيد يدزك لتجنيد المنطقة وابو تجنيد المنطقة يگلك ليش شعرك طويل ،، روح زين وتعال حتى امشي المعاملة ،، بابا اني مدني مو عسكري !! ميفيد !!! تزين وترجع والمنطقة تدزك للتجنيد العامة وبعد ان تعمل كفالة ٤٠٠ دينار حتى تولي تهج فد شهر زمان ،، ومن ترجع وتريد تسافر بعد اسبوعين مثلا ولامتحان قبول للدكتوراه او الماستر !!! تعاد نفس القوانة !!! وابو العامة يسألك شكو مولي مسافر يوميه ! تتخرج وتنام عليك الطابوگة !! وبعدين تاخذ دكتوراه بافضل انواع البساطيل والجرسي والقماصل المطرية !!! وانواع اللحم المچفن !!!!! النيوزيلندي والاسترالي !!!!!!!!
وبالجيش من تتعاقب يروح ن ض فلان بالهرولة وهو العود الهيبة ، رئيس عرفاء الوحدة ليقدمك مذنب للمساعد وانت متعرف ليش وليش مغيبيك !!! ،، وبالباب يگلك ذب النطاق والبيرية عبالك فايت على رومل ،، لو مونتغمري !!! وبعدين من يسمعك المساعد يرزل ن ض فلان رزاله زينة ،، دماغسز !!! يكله لويش قدمته مذنب مو هو نازل مساعدة من عندي ديجيبنله حاسبات صغيرة للوحدة ببلاش fx21 كاسيو وحبر مال رونيو !!!! ومن تطلع الاجايز الظهر يضمها رئيس عرفاء الوحدة ن ض فلان للمغرب حتى متلحك على سيارة تاخذك توديك وتضيعلك عشر ساعات ويوم كامل كاعد بالگهوة مال المصري بالچول بالبرد والمطر والطين ، تشرب چاي وتاكل بسكت وتدخن على اساس كونيكشن بمطار شارل ديغول !!!!!!!!!!!!!!!!وانت تسب وتفشر !!!
هسه ،، او اليوم والزمن الاعوج مثل ذيل الچلب !!!

كل حچاية وگالك الدستور وهو يفصل الدستور الاجقل على راحته ،،
يگلولهم غيروا قانون الانتخابات ،، يگولون الدستور يگول ،،،. الانتخاب حق كفلته وبشرف سان ليغو ،
يگلولهم الحر كتلنه والضيم والفگر ،، يجاوبوهم ،، ليش ،،، مو الدنيا ربيع والجو بديع ،،
يسألوهم فلانة شايله الرحم والمبايض وعمرها سبعين سنة ، وبليه سنون ، يجاوبوهم ،،، صدگ ،، الله يبشركم بالخير وبچم شهر حامل !!!!
يگلولهم فلان يگح و..... وبيه الف علة ومخرف ومحتاج رعاية خطية !!! ،، يجاوبوهم ميخالف خلي يقدم على وفد الالعاب الاسيوية لالعاب القوى !!
يگلولهم فلان خطية ، ميت من الجوع وعمره ٦٠ سنة ،،، اعمى وميسمع ودرجة العجز ٢٥٠ ٪‏ ،،، يجاوبوهم ، خللي يقدم طيار على القوة الجوية !!! من تنفتح الدورات الجديدة !!!
يابه فلان يمتمت وأمي ميعرف يقره ويكتب بلكي فد شغله ،، تره كاتله الهبري !! ،، يجاوبوهم حاضر ،،، خلي يصير محلل استراتيجي ومقدم برنامج بالتلفزيون !! رح يفتحون فرص عمل للشباب !!!!!
يگلولهم هوسه ومحد ديفتهم شديصير بهل البلد ، واحنه وين رايحين !!! يجاوبوهم افلاطون يحب اخت ارسطو ! بس هي متحبه !!!!!!!!!!!
يگلولهم الفساد والبوگ وطيحان الحظ واصل للزردوم !!!!!!!! ،، يجاوبون ،، ديروا بالكم لتختنكون !!!
ويگلك الواحد شلون ميتخبل رسمي ،،،،،، ويگوم يسأل والحايط يجيب !!!
ومن طاح حظ هل العمر الاغبر !

الأبراج وتفسير الأحلام

المتواجدون حاليا

656 زائر، ولايوجد أعضاء داخل الموقع