الگاردينيا - مجلة ثقافية عامة - تأكد من كان يشرب منكر كان لابس عمامة لو أمفرع؟؟؟

تأكد من كان يشرب منكر كان لابس عمامة لو أمفرع؟؟؟

               

 تأكد من كان يشرب منكر كان لابس عمامة لو أمفرع؟؟؟

مصيبة المصايب عندما يتدخل رجال الدين بالسياسة و كلامهم مثل صك المصدق يمشي على الناس الغلابة وبعدين الحكومة مضطرة وراسها گبل رجليها أن تنفذ هالأوامر والتعليمات اللي اغلبها كلام فارغ ومن غير معنى!.

أورپا عانت هواية من هالمسألة وحينها فصلت الدين عن السياسة وصارت تمشي وتشتغل مثل الساعة السويسرية ومضبوطة الشغلة ضبط العگال!!.
يا جماعة الخير:
رجل الدين شغله ومكانه معلوم للجميع ، الجوامع و الحسينيات و الأرشاد و حث الناس على الطريق الصحيح و القيام بالواجبات الدينية واحترام الكبير و الجيران و ألامانة والأخلاص في التعامل والعمل.

رجل الدين اله مكانه خاصة عند الجميع وهو يستحق التقدير والأحترام وأكثر.
ولكن شلون يصير رجل دين أمعمم يتدخل بالسياسة والأقتصاد و الثروات الطبيعية وتصدير البترول وتعيين الوزراء والسفراء وغيرها؟؟.
اذا هيچ خو خلي الجامعات العالمية و البرلمانات تغلق ابوابها و ينطون مجال لأهل العمايم أن يستلموا الحكومة من الأول للأخير.
بالعراق ( ما على بغير دولة) ما تقومنا قيامة طالما رجال الدين أمسيطرين على الدولة وسياسة الحكومة وبرامجها ، والله لنرجع ليورا مئات السنين و ما نعرف شنو القصة!!؟.
اليوم بعراقنا المحتل و المنكوب نقبل ما نقبل يحكمونا رجال أمعممين وكلامهم مثل السيف على شريحة واسعة من المجتمع وقبلهم على اللي يحكمون البلد من رئيس الوزراء الى أخر مدير عام مرورا بأعضاء البرلمان والمحافظين ومجالس المحافظات وشرطة المرور و مكاتب الصيرفة وعربانات الشلغم واللبلبي وبائعي بيض اللگلگ و عمبر ورد وحسنية الحفافة و سليمة العورة الخبازة وشربت الحاج زبالة و كبة السراي و حُميدة أم اللبن ودوحي ابو الفشافيش ودربونة مشهورة بساحة الميدان (نسيت أسمها!!)!!.
حيلة اي واحد يحچي هالحقائق ، رأسا يتهم بأنه عدو يشتغل لصالح اسرائيل و من بقايا ازلام النظام السابق و عميل لدول الخليج وكل شهر يستلم حگة دولارات وباونات!!.. ومو بعيدة ثاني يوم يطگوا بالدهن والله وياك عبوسي!!.
شحچاك يا مصخم ؟؟؟ أگعد وأسكت حالك حال الملايين اللي بس يصفگون و مايعرفون شنو الفلم؟؟؟.
كلشي عليهم حلال و يلگوللها فتوى من (بعض) أهل العمايم و يريدوها صغيرة صغيرة أو چبيرة وعلى هالرنة طحينچ ناعم وعينك عينك من غير مستحى من أحد ، بالمناسبة هو اللي مايستحي من رب العالمين شلون يستحي من بني بشر!!؟.
راح احچيلكم هالحادثة وعلى لسان شخص معروف كان المساعد الأول لأحمد الچلبي أيام تواجدهم بالخارج ويشتغلون سماسرة ، يعني گبل أحتلال العراق:
[افاد انتفاض قنبر حقيقة كانت مخفية عن العراقيين جميعا حيث قال:
(أقسم بالله في مؤتمر نيويورك ١٩٩٩ للمعارضة كنت مسؤول عن تسديد مصاريف بعض المدعوين .. تفاجئنا عندما رأينا قائمة بمبالغ طائلة لاحد القيادات الدينية الذي استهلك كل المشروبات المسكرة في ثلاجة غرفته .. وشخص ثاني "سيد" جائتنا قائمة باهظة لمشاهدته أفلام أباحية في غرفته!!. ..
كنت مآخذها للشغلة كلش بجد فشوفته للمرحوم الجلبي وقلتله:
طلعنا احنا العلمانيين خوش ولد وهمه السرسرية .. !!.
جاوبني وقال "طبعا ليش ماتدري]
وأكيد هالأخوة النشامى اللي فعلوا فعلتهم بلندن اليوم واحدهم مسؤل وأكبر من أكبر زمال حساوي بالعراق و كلامه يمشي بسرعة أي طائرة حربية!!.
عندي صديق بداخل العراق هم طاگة روحة من كل التصرفات اليومية من قبل هؤلاء وكتب لي وگال:
واجهت رجل معمم بهالخبر وگلتله :
مولانا شنو رأيك بالخبر؟؟.
گال: اخوية هو هذولة ليلتها كانوا لابسين عمايم لو كانوا أفندية؟؟.
اكيد كانوا أفندية بالأخص بلندن و حاضرين مؤتمر مهم برعاية أمريكية لأسقاط النظام الكافر والفاسد بالعراق !!، اذا وين المشكلة؟؟ حتماً كانوا فرحانين ومنطلقين وبعدين ترة الله حبله طويل ، قابل أنتهت الدنيا؟؟!!.
با الله عليكم هذه شتخليلها وأتطيب؟؟ بدل ما يكحلها عماها!!.
لعد وين كلامكم بمنع المشروبات واغلاق محلاتها و المنكر حرام في حرام الى يوم الدين؟...خلوني أسألهم بالفارسي:

آقا کلمات شما درست نیست، شما هر شب صبح نوشیدیدِ و آنها را به عموم مردم محروم می کنید؟؟

أغا كل ليلة تشرب الخمر حتى الصباح وبعدين تحرمها على عامة الناس ..ليش؟؟.
أعزائي:
الرگعة صغيرة والشك جبير...
الى اللقاء في حلقة أخرى..اودعناكم عيوني..
أخوكم
رئيس التحرير

            

    

إذاعة وتلفزيون‏



الأبراج وتفسير الأحلام

المتواجدون حاليا

421 زائر، ولايوجد أعضاء داخل الموقع