لادادة لاء .. صدام حسين چان سالبنا حريتنا، خلينا نتمتع بطعم الحرية!!

   

 لا دادة لاء..صدام حسين چان سالبنا حريتنا، خلينا نتمتع بطعم الحرية!!

دوائر الدولة والله لايچذبني 95% منها على گولة غوار الطوشي : حارة كلمن ايدو الو!!.

صايرة لخة وابو المزيقة ما يعرف بأبو الطبل فد نوب و كلش!!.
رسالتين احداها من أحد الأخوة من سكنة بغداد الأخ (ابو حسين) والأخرى من صديقة الگاردينيا( أم محمد) اللي تسكن بصوب الرصافة وهم أبغداد.
نبدأ بالحالة الأولى للأخ (ابو حسين):
راجعت دائرة (...) لأنجاز معاملة چنت أتصورها سهلة ومايرادلها غير بالزايد ساعة لو أقل ولكن اللي صار ما تسولف ولا قصة عنتر و الف ليلة وليلة!!.
بعد ما سألت وجهوني على موظفة محجبة (الله يستر عليها) ، سلمت ماردت وچانت ما ادري أدردم ويه روحها ، ظليت أنتظر ترد السلام!!.
شالت راسها وجرى حوار بيناتنا:
- ها حجي شكو ؟؟ شرايد؟؟
والله بنيتي هذه هي المعاملة وگلبيها؟؟
- حجي يرحم والديك وين الوقت حتى اگلب معاملاتكم..؟؟وبعدين ماداتشوف راح يوذن الظهر؟؟
بنيتي وصلاة الظهر شلها علاقة بالدوام الرسمي؟؟
هو اني انطيت رأيي لو أبتليت وعيونكم ماشافت فكت لسانها:
- والله خوش.. هم نزل وهم يدبچ؟؟ شنو انت وين نايم..؟؟ احنة مو دولة اسلامية؟؟.
العفو بنيتي اني مو قصدي.. لكن..
- لا لكن ولاهم يحزنون انتظر كلها نص ساعة انخلص الصلاة و انجز معاملتك.
زين نص ساعة موهواية؟؟
- بابا انت منو دازك علينا ؟؟ مفتش بالوزارة لو من بقايا النظام السابق!؟؟
لا بنيتي راح أنتظر وأمري لله.
يگول أبو حسين أنتظرت بالضبط 25 دقيقة وبينت الأخت وبيدها سبحة الله لايچذبني اكثر من مية حبة.
توجهت الى مكانها واني هم گمت من مكاني ومجاملة گلتهلها: صلاتچ مقبولة انشاءالله.
ولا ردت واستمرت تسبح وتقرأ ايات ومعوذات و تنفخ على اليمين وعلى اليسار حتى تطرد الشر!!.
بعد شوية شالت راسها وگالت.
- حجي الدوام راح ينتهي ليش ماتجي باچر من الصبح واخلصلك المعاملة!!.
شأسوي أمري لله گلتلها خوش..بس فرد سؤال:
انتوا يوميا هالوكت تصلون وتتأخرون نص ساعة وهذا الوقت مقطوع من ساعات العمل ، مو تمام؟؟
- ان شاء الله تمنعنا من الصلاة؟؟ ، شوف عمي روح لايسمعوك أصلاً اني موظفة مخلصة وملتزمة دتشوف هذيج الأخت اللي نايمة بمكانها؟؟ ، هذه طول فترة الدوام تلگاها بغرفة الصلاة أتصلي خمصطعش لو عشرين مرة  ، شوف نور محمد بوجهها ، علوية وماتريد تخالط أحد.!!.اصلا تستحرم تحچي وية الرياجيل!!.
شأحچي وشأگول ؟؟شنو ماكو مدير؟؟ مسؤول أشكيله؟؟؟.
وبالأخير گالت:
- مديرنا وردة ما الله هو اللي يشجعنا على ممارسة الشعائر الدينية اثناء الدوام، هاا نسيت أگولك ديربالك تراجعنا بشهر محرم!!.
ها ابو حسين وانت شسويت؟؟
نعلت روح أمي وأبوية اذا اراجع بعد..شگيت المعاملة وذبيته بتنكة الزبل ورجعت للبيت!!.

الحالة الثانية، رسالة الأخ / ام محمد:
قبل فترة راجعت (مصرف ال...) لأنجاز معاملة مصرفية شفت العجب العجاب!!.
مو عبالك بدائرة حكومية..لاء عبالك بدار ازياء ومنافسة بين العارضات.
الأناقة والجمال والمكياج شىء حلو للمرأة ولكن كلشي بحدود وبمكانه، ملابس سهرة غير ملابس التسوق وملابس الدوائر أكيد غير! .
موظفة ،الله لايچذبني لابسة حگة ذهب من اساور وگلايد ومحابس ،خو التراچي يمكن بيها ربع كيلو!! .
هذه گاعدة ورا ميز بس تباوع عالمراجعين عبالك تعدهم لو كاميرة مراقبة وتوزع ابتسامت وبين فترة اخرى ادگوم من مكانها وتاخذلها (گشة) بين الموظفات وترجع المكانها وكيلكم ابو الجوادين ما شفتها تنجز ربع شغلة!!.
الأخرى لابسة بنطرون جلد ضيگ مع (حجاب چذابي) على راسها ،هذه ما ادري شجاها كل دقيقة تشاور وحدة من زميلاتها الله لايچذبني چانت تستعرض مؤخرتها حتماً وإلا ليش توگف هيچ ودايرة گفاها عالمراجعين!!؟؟.
أغرب موظفة هي اللي شغلتي يمها...يايابة شلون موظفة؟؟ خمس نجوم!.
يا الله قرقوز فعلي، مكياج طوخ وامخربطتها للوحة ، شعرها عبالك عمارة الدامرچي ، ما أعرف شلون أموگفتها ،بالضبط عبالك احدى ممثلات مسرحية عادل أمام(الواد سيد الشغال)!.
شفايفها صايرة شوية أخف من البابوج اللي لابستة اليوم ، عبالك ملدوغة بألف زنبور! ، الخدود ما اطولها عليكم حاطتلها تفاحتين بالتمام والكمال بالضبط مثل بگلايتات الباصات الخشبية مالة أيام زمان نعني دگ النجف !.
وبلا مبالغة حاطة حگة (علچ ماي) وتعلچ.. يابووو شلون منظر يقزز!!؟...أما ألاظافر كل أضفر قوس قزح والمصيبة مو شابة لاوالله فوك الأربعين وبعدهي أنسة!!.
ولچ يا قشمر هذا منو اللي يتقدملچ و يگلبچ؟ .. صدگ لو گالوا:شكول شكول ورد الباجلة!!.
الغريب والأغرب حاطه رموش أصطناعية!!. وكل ثانية ترمش و توزعها علينا عبالك مرسيدس أقچم موديل ١٩٥٧ و يشعل عالي و ناصي!!.
ما گدرت أسكت گلتلها:
- اخيتي ماتزعلين أسأل سؤال؟؟
وعليش هالزعل بس ليگدام أعرف سؤالچ .. قصدچ على اناقتي و ترتيب شعري والمكياج.. واسم العطر.. و ماركة الساعة .... مو؟؟
اني احب الحياة والجمال( عبالك دتقدم نفسها بركن التعارف) ولذلك كل يوم الصبح احتاج ساعة وشوية أرتب بيها روحي ، اني متأكدة انتِ هم حالچ حال كل المراجعات معجبة بشكلي وترتيبي مو؟؟.
شوفي دادة هالزمن غير زمن صدام حسين اللي چان سالبنا حتى حريتنا باللبس والمكياج والحركات كنسوان و موظفات بالدوائر ، الله وكليچ چنا انخاف حتى من خيالنا !! اليوم انعيش عصر الحرية والأنفتاح وممارسة الديمقراطية الحقيقية ( تلقي محاضرة بندوة سياسية ) لذلك خلينا نتمتع بالحرية وإلا يفوتنا القطار!! لعد شلون ، الدنيا ماتسوة دادة بعدنه شباب لا والله شباب ونص!!.
شغلتي تطلب منظر جميل والله جميل ويحب الجمال! هاهاها...تفضلي عيوني.
غطي سنونچ ولچ، من عابتلچ هالخلقة الزفرة چنچ شيتة طرزان لاوالله هذيچ شوية احلى و أرتب!!.
كلشي ما حچيت، الى الوراء در وطزززز بالمعاملة وبحريتكم و نظامكم و مديركم اللي يقبل هالمهزلة ،اقسم بالله حديقة الحيوانت اجمل وارتب منكم يا ....!.
واخيرا:أني أختصرها وأگول:
الى اللقاء الى مهازل اخرى في عهد الحرية والديمقراطية العرجاء والسلام عليكم ورحمة الله وبركاته نحن بصحة جيدة سؤالنا الوحيد هو عن صحتكم و عن طيب خاطركم واعتدال اوقاتكم علينا لله الحمد وان تسألوا عنا لايهمنا شىء سوى فراقكم الغالي ... وسلمتهم يا أم حسن.... وهاا اخوتي هاااا
هاااااااااااااا
في أمان الله ، مالي خلك وية الشوادي ،اعتذر منكم والى لقاء اخر..اودعناكم عيوني..وكان الله في عون اختنا العزيزة أم حمودي الوردة..والعزيز أبو حسين.
أخوكم
رئيس التحرير

         

   

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

543 زائر، ولايوجد أعضاء داخل الموقع