شـَـعـبي مَحـْروگ ابـْـتَـنـورْ

التفاصيل

تم إنشاءه بتاريخ الثلاثاء, 18 آذار/مارس 2014 19:35

كتب بواسطة: ميسون نعيم الرّومي

ميسون نعيم الرّومي

شـَـعـبي مَحـْروگ ابـْـتَـنـورْ

دولاب الدنـيـَه بـيـنَـه ايـدورْ- شـَـعـبي مَحـْروگ ابـْـتَـنـورْ
مظلومه ظلم أمنه العراقية
بالنار ابجمر مچويه
من عهد العهد مسبيه
تبچي تنذر بس انذور- شـَـعـبي مَحـْروگ ابـْـتَـنـورْ

من حَرب الحَربْ يفتَرون
اولادْ المَلحَه ينكَـتلون
عَديَنَه اوما ينعَدون
ياويلي شَعبي المَغدور- دولاب الدنـيـَه بـيـنَـه ايـدور

مَجروح الجَرح اوكلـَّه اجروح
ريحَة موت اومنَّه اتفوحْ
منهه اوينزف دَمْ الروحْ
اتعَبنه اوصرنه حيف اجسور- شـَـعـبي مَحـْروگ ابـْـتَـنـورْ

تاريخك يالبيه ادموم
من هولاكو حد اليوم
شعبك يعراقي مظلوم
ياجار اويذبح مجرور - دولاب الدنـيـَه بـيـنَـه ايـدورْ
*******
شاخَت شابَت آخ ادموع
شعبي امكدر دومَه ايلوع
مكتوم صوتَه اومَبلوع
مظلوم الساكت وايدور- شـَـعـبي مَحـْروگ ابـْـتَـنـورْ
*******
ليلك يعراقي هالطال
دمَّك نهران اوهالسال
مذبوحَه انذبحت اجيال
اگبور اندفنت فوك اگبور- دولاب الدنـيـَه بـيـنَـه ايـدورْ
*******
نلطم نبچي نشبع نوح
نبچي عَ الوطن المذبوح
ياحزن اوساكن بالروح
موشوم الضيم اومَحفور- شـَـعـبي مَحـْروگ ابـْـتَـنـورْ
*******
مَخلوس اشمالك مَرعوب
تندب تشكي بس اتلوب
يا موت امچور عَ البوب
دَمَّك ياشعبي مهدور- دولاب الدنـيـَه بـيـنَـه ايـدورْ
*******
سجل اكتب يا تاريخ
تضرب لشباح اصواريخ
دولتنه دولة بطيخ
دمنه جاري دومه ايفور- شـَـعـبي مَحـْروگ ابـْـتَـنـورْ
*******
نعم نعم عيني بلي
صفحه الك صفحه الي
يعراقي دومك مبتلي
حكام التحكم بس اتجور- دولاب الدنـيـَه بـيـنَـه ايـدورْ

آذار / 2014
ستوكهولم

الگاردينيا: الشاعرة / ميسون ...