دارميات الى المنتخبين -٢ و ٣

ميسون نعيم الرومي


دارميات الى المنتخبين

-٢-


بعتوْ الوطن ظلام جيره ابفركم
ساعه اوتجي فد يوم نمحي اثركم
***
لا تنتخب اشرار واتزعل (الحسين)
شوفو العراق اشلون راجع وره وين
***
انتم شباب اليوم بيكم أملنه
لو صرتو ايد ابإيد يزهر وطنه
***
خربو وطنه اجناب ساد التخلف
باگونه باسم الدين ساد التطرف
***
اصواب العراق اصواب بالگلب چتال
ضيم واقهر وادموع وي شلـَّة الحال
***
لملوم او علينه التم زلم اونساوين
سقط المتاع اهواي جابوهم امنين؟
***
مدمن على الآهات واللطم والنوح
راضي ابحياة الذل وامعذب الروح
***
يمشي مثل طاووس وسط الحمايه
بوگ الاراضي خوب عند هوايه
***
هذا الشعب متعوب كل وكته مضيوم
ياهو اليجي يوليه والسبب معلوم
***
بالدمع نغسل دم لايا وشعبنه
نرضه ابمهانه اوذل وسفه اوسكتنه
***
ظلمه او خليه الدار راحو اهلها
بيده العراقي اليوم هوَّه اليحلها


الى المنتخبين
-٣-
ميسون نعيم الرومي

شد حيلك انهض خوي وانتخب الاحسن
كلهم عصابة ذول واحدهم ارعن
***
لا تنتخب حيتان بالوطن لعبت
*باگت الخير البيه واچماله (تشحت)-
***
*شوف (المفوضيه) اليوم تكرف بالفلوس
وابحجة التصويت ملين يمنحوس
***
لو تغلط اول نوب كلهه تعينك
لو ثاني مره انوب كلهه تدينك
***
احذر يشعب اليوم لا تنتخبهم
نفط العراق الراح كلـَّه الربعهم
***
خـَـلـّنـَه ننتخب وانصفي بالنيه
حلفوا بالشرف ما ضل حراميه
***
احله وطن بالكون گالو وطنه
زرعو تخلف بيه خربوْ اسمـّـنـّه
***
بين الدول مهيوب چانوْ اهلنه
صرنه نوطي الراس وانظم اسمنه
***
يا شعب هذا اليوم اي والله يومك
اكنس زبل حكام محد يلومك
***
شعب العراق الزين خـَلـّصنـَه منهم
اثبت وجود اليوم لا تنتخبهم
***
يا شعب اصحه اوثور واكلبهه بيهم
ذل اوتخلف جوع كله امنديهم
***
افرح يا شعب وارگص ابچفيه
كلهه اتحالفت شوف الحراميه
***
سرقوه النفط والخزنه فرغوهه
اسموم اتحزموا للشعب باعوهه
***
اليوم يومك ياشعب تتنكـّه تختار
واليسكت تره.. بالگصَّه وصمة عار
-------------------------
12/آيار/2018
ســـــــــتوكهولم

 

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

739 زائر، ولايوجد أعضاء داخل الموقع