الگاردينيا - مجلة ثقافية عامة - حجاية التنگال ١١٣

حجاية التنگال ١١٣

                                               

                             د.سعد العبيدي

حجاية التنگال ١١٣

إلى يبط الگلب ويورّم الچبد من صدگ بعراقنا الجديد، من تصير مناسبة خاصة الزيارة الدينية أو الحج، يخلي أخوتنا المسؤولين كثير من المسؤولين، عباتهم فوگ اچتافهم ويركضون يأدون الفريضة الي عليهم، طبعاً الحج أكيد من غير قرعه مثل ما جرت العادة والزياره من غير تكاليف، وما أريد أگول على حساب الحكومة، لأني ما متأكد من هذا الگول. بس بيها عشت هواي.
أريد أسأل هذا المسؤول يا إبن الحلال، ليش هالاستهانة بعقول الناس ومشاعرهم؟.
ليش ما تحسب حساب الوادم الي داتشوف نجوم الظهر من الضيم والجوع والقهر، إشراح يصير لو تخليها لما يدر الحول يعني للسنة الجاية لو الي وراها اشراح يصير، هم بيها تنحسب واگف ويه ربعك بمحنتهم، وهم تقَنعْ الجمهور إنك ما تستغل منصبك وتاخذ مكان واحد مستحق، وهم وياها تمحي الذنوب الي راح تجمعها من اليوم لغاية السنة الجايه.
والله يا جماعة بموسم الحج الي فات ما چنت مصدك أحد راح يروح للحج من المسؤولين لأن الوضع صعب، إلا من شف واحد أعرفه دز صورة هناك وگال دا أدعيلكم ببيت الله. يابه لا تدعينه، ما نريد دعواتك. وأگللكياها بصراحة اذا تگدر خلص نفسك من ذنوبك، لأن ما ممكن أقتنع الله سبحانه وتعالى راح يمحيهن كلهن بجرة قلم لو بدوسة زر، ليش هو عداد كل سنة تروحون تصفروه؟. وإلمن تقشمرون؟.
يا جماعه حقه أبو المثل من گال شتحطلها وتطيب.
والله ما راح تطيب بعد مية سنه، اذا بقه عدنا هذا المسؤول وبقت طريقة اختيارة شيش عوازه.

الأبراج وتفسير الأحلام

المتواجدون حاليا

591 زائر، ولايوجد أعضاء داخل الموقع