الگاردينيا - مجلة ثقافية عامة - حچاية التنگال ٨٢

حچاية التنگال ٨٢

                                              

                          د.سعد العبيدي

حچاية التنگال ٨٢

يمكن داخل حسن الله يرحمه ويرحم والديكم هو الي غَنّهَ ضاع الصدگ يا ناس وبعد وين الگاه.
إشلون راح نلگاه وجندي يطلعْ بالفضائيات يصيح يا ناس انباگتْ كلِيتْي ويتورشعوه اعلاميين من كل مكان يدَوّرون حكة خشم دا يشعلولهم فتيله، وگبل ما يتأكدون يصيحون أويلي انباگت كليته. ومن بعدهم راحتْ الوادم متعاطفه ويه المبيوگ وگبل ما تتأكد ركضَت ودشاديشها بحلوگها وتصيح يا خلگ الله انباگت كليته.
وعلى هذا الديدان يا حميدان صارت الحچاية چنها صدگ وأصبحت راس مال.
يمعودين على كيفكم الأطباء يگولون وحقهم يگولون مو هيچي الحچي، ليش هو رَفِعْ الكلْيّهَ وزرعها لعب اچعاب وهاي وثائقنهَ گدامكم لا انباگت، ولا هم يحزنون، كل القصة وما بيها هو الرجال اتبرع بكليتهَ گبل فترهَ.
زين إحنه الي دا نتفرج على الحدث وين صرنه، والله خليتونه بحيرهَ يمعودين الكلية مال الجندي وين صارت؟.
ولمن هو جندي وأكيد مطوعْ لأن بعد وبهذا الوكت ما عدنه مكلفين، اشلون يتبرع بكليته بدون موافقات وأوامر مو راح يتصنفْ ما يصلح للخدمه العسكرية.
واذا هو إتبرع من كيفهَ وگال انباگت كليتي مو هذا نصب واحتيال على الدولة والجيش وعلى الشعب الي وگف وتعاطف وياه.
أگول العتب مو على الجندي الي خالف الدين والدنيا اذا صدگ طلع ناصب علينهَ.
لا، على المستعجلين، وبس يريدولهم عَزهَ دا يلطمون بيه، والعتب الچبير علينه إحنه الى صرنهَ نصدگْ بكلشي يعني چان ما چان.
وما نسأل عن أي شي منين ما چان.
المهم نطلع على الهوا ونحچي إشلون ما چان.

الأبراج وتفسير الأحلام

المتواجدون حاليا

577 زائر، ولايوجد أعضاء داخل الموقع