حچاية التنگال ٧٦

                                      

                      د.سعد العبيدي

حچاية التنگال ٧٦
مرت آخر قمة عربية انعقدت بالبحر الميت. ما درنالها بال مثل گبل يوم چنه ننتظر ونتأمل اشراح يصير ونتحمس للي صار.

صفينه بهاي الأيام گاعدين گبال التلفزيون ندوّرْ بين أهل القمه منو منهم نام ومنو وگع ومنو يبحش بخشمه.
ما أدري ليش صار بينا هذا الي صار، يمكن إحنه مَليَنهَ، لو همهَ مو همه، لو الزمن زغرهم بِعيُونهَ وبعد ما نشوفهم هيبه مثل ما چنه انشوفهم من گبل.
لا وإچماله يطلعولك بحچي چبير ويگولون إنطَبِعْ ويه اسرائيل إذا انسحبت لحدود ١٩٦٧، يعني الاخوان يحطون شروط!.
ولكم إذا انتم حتى ما مالين إعيونهَ إحنه الغشمهَ، البسطاء، أبناء السبيل عاد تريدون تملون عيون الإسرائيليين والامريكان والاوربيين،اليهود منهم والمسيحيين ، ثم انتم مصدگين اسرائيل راح تسمعكم وانتم ما دا تسمعون شعوبكم الي خليتوا نصهم مگادية، ونصهم دايحين يدورون لجوء والباقي طيحتوا حضهم.
أگول لمن انتم مستعدين تطبعون ويه اسرائيل لعد ليش ما سمعتوا الرئيس التونسي أبو رگيبه أول الستينات من گال عمي طبعوا وإخلصوا، وليش ما سمعتوا الحسن ملك المغرب الي گبله گال طبعوا واتركوها للزمن وبعد اسنين راح تشوفون العرب المسلمين والمسيحين يصيرون أغلبيه لأنهم يفرخون مثل الأرانب وتاليها غصبن على اسرائيل وعلى أبوها تندمج بالمجتمع العربي وبهاي الحاله تفيد وهم تستفيد.
هسه وبعد خراب البصرة تريدون تطبعون وانتم أضعف من گشر البيض.
أگلكم بصراحه، والله لو تنطون الصايه والصرمايه لاسرائيل ولو تسلبدون بعد وبعد ما راح تنسحب ولا تشتريكم بفلسين.
الأحسن ابنوا انسانكم حتى يصير قوي وتتقون بيه.     

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

595 زائر، ولايوجد أعضاء داخل الموقع