حچاية التنگال ٥٥

                                                     

                              د.سعد العبيدي

وحق العود ورب المعبود ما أصدگ.

والله وبالله وتا الله والثالث اسم الله ما تخشْ عقلي الي إنشر عن جامعة أكسفورد البريطانية تختار جامعة واسط العراقية كأحسن جامعة اقليمية من ناحية الادارة المهنية والعلمية والاكاديمية والانجازات، اضافه الى مستوى الخريجين وتختار رئيسها كأفضل مدير لهذا العام في العلم والتعليم والشهادة وترشحه للتكريم في مؤتمر قمة قادة الاستثمار بالعالم.
بالمناسبه أگول:
لو جامعتنا تچذب وأستغفر الله من الچذب لأنه حرام.
لو جامعة أكسفور الي يصنفوها رابع جامعة على جامعات العالم تچذب وذوله كفار يجوز يچذبون ويداهنون ويدهنون.
 لو إحنه غشمه وكلشي نصدك. طبعاً نصدگ ليش لا مو صدگنه الأغرب.
گلولي يا هل الخلگ لمن رئيس جامعه بزره وهو استاذ گد الدنيا علايم اخوتنه المصريين يخلي گشمنديهَ بالباب الرئيسي للجامعه شغلهم يچيكون لبس الطالبات وخلفله عليهم ما يسوون شي بس يرجعون البنات الى ما لابسات لبس محتشم. يعني مثل ما يريد هو وربعه ويفحصون چعوب الأحذية ويرجعون كل وحده چعب حذائها أعلى من(٥) سم على مقياس حمودي. والأتعس من هاي خال وحده مثل العتوي تمسح وجوه الطالبات خاف مخليات مكياج.
بربكم هاي أحسن جامعه ورئيسها الي يسوي بطلابه هيج تكرمه جامعة أوربية طلابها يدخلون المحاضرة بالشورت.
هذا الريس يذكرني بمحافظ بغداد بداية السبعينات من صارت موده (المايكروجوب) خله جماعات بالشارع تصبغ رجلين البنات واحنه الشباب نتگرضم.
يالـه الأمه الي جامعاتها تطيّر فيالهَ، شعبها خلي يطلع يطگطگ حرمل حتى لا تحسده الشعوب الأوربيه المتخلفه.
وتباً للمستحيل وعاش المنافقون والله وأكبر.

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

832 زائر، ولايوجد أعضاء داخل الموقع