الگاردينيا - مجلة ثقافية عامة - حچاية التنگال ٣٦

حچاية التنگال ٣٦

                                     

                         د.سعد العبيدي

ما تفاجأت بالحچي إلي طش بين الوادم عن موازنة النواب للسنهَ الجايهَ إلي خلوها مكاسب ما صايره. حتى انهم قدموها كلش من وكت، وبتموز الي حرارته تحرگ اليافوخ، يمكن گالوا خليِنهَ نقدمها بالحر حتى محد عنده خلگ من الشعب يحتج ويحچي.

أول مره وگبل ما أقره وأدخل بالتفاصيل والأرقام، گلت والله يابه ذولهَ يشتغلون والشعب ظالمهم خطيهَ، دشوفوا بعيونكم الي باچر ياكلها الدود، اشلون ميزانيات ذيچ السنين تتقدم بآخر خمس دقايق من السنه ومتخلص ولا يصوت عليها غير وره بداية السنهَ بچم شهر، خو گبل ثلث اسنين خلصت السنه وماكو ميزانيه. گلت هذا وياريتني مگلت، لأن طلعت السنهَ الجايهَ آخر موازنه لأهل هاي الدوره بالبرلمان، والظاهر والله العالم، الجهابزه البيهم ركضوا يدوّرون على فرصه يستفيدون منها لآخر درجه، حتى لو يِنّعِلْ أبو الشعب الى انتخبهم. وَلوْ تريدون الصدگ الشعب الى انتخبهم مو بس يستاهل، لكنه بالعقل يعتبر إمشارك وياهم بالغلط. وأگول متعجبت من مخلين بهاي الميزانيه زيادهَ ٣٨٪ عن ميزانية السنه الحاليه، لأن ميدرون أكو تقشف وشد حِزِمْ حَزّتْ بطون الفقرهَ، وما إتعجبت من الامتيازات الى حاطيها تساوِيهم بالوزراء، ليش لا، يتعبون أكثر من الوزراء (مو دا يصوتون). لكن الى معجبني وما خاش عقلي المكافئات وشراء لوريات، وبايسكلات وملابس.
متفهمونا شتكافؤون وجنودنا يقاتلون بالحر بلا مكافئات؟.
ويا ملابس توزعون والمقاتلين مرات يشترون قيافتهم من السوگ؟.
ويا لوريات تشترون، أگول أخاف تريدون تاخذون مقاولات تنافسون بيها عمال التنظيف برزقهم؟.
أما البايسكلات فبهي.
شنگول الله يفيّن حظنهَ مو حظكم.  

 

الأبراج وتفسير الأحلام

المتواجدون حاليا

525 زائر، ولايوجد أعضاء داخل الموقع