حچاية التنگال ٢٩

                                

                      د.سعد العبيدي

المحكمة الاتحادية العليا أجلت لهذا الشهر "حزيران" البت بقضية جلستين للبرلمان صارن بغياب الرئيس الدكتور الجبوري ونوابه.

واتخذوا بيها المجتمعين قرارات بفصلهم شلع. والمحكمة حقها، واذا حكمت بالجلسة الجاية خلفله عليها ورايتها بيضه، لأن ينرادلها وكت تفرزن الصدگ من الچذب وتدرون ربعنا أبد ميچذبون. وبالمرة تشوف الحضور همه فعلاً لو إتصفط حچي واحنه أبد ما نصفط، وتباوع السيديات خوما مدبلجيها، ويمكن تطلب شهود. أگلكم:
ليش ما تخلون الله بين عيونكم والعراق جدامكم والتحرير وحاجات الحرب فوگ روسكم، وتفضون شغلة الاختلاف بيناتكم مراوس، مو أحسن من هذا الفراغ التشريعي الي إحنا ما ناقصيه بهاي الأيام.
وليش ما تدگون دگة مردانه انتو جماعة الاصلاح، وتسوولكم كتلة معارضة بالبرلمان حتى تتسجل باسمكم إنتم الي بديتوا الديمقراطية الصحيحة بالعراق بعد ٢٠٠٣. الديمقراطية مال الأوادم الي لازم بيها جماعة تحكم وتتحمل مسؤولية الحكم، وجماعة گبالهم تعارض وتراقب،
وتعدل... وهيچ يا جماعة الخير يمكن تمشي السفينه، ويمكن توصل للجرف بسلام، واحنا شنريد غير السلام بوسط هذا البحر الهايج، وبالمرة تحصلون أجر عشرة أمثال سوايتكم، مو رب العالمين يگول بالقرآن الحسنة بعشرة أمثالها، وهاي أكبر حسنة يمكن تصير وأكبر أجر يمكن واحد يحصل عليه.  
لكن أگلكم تره الأمور مو هينه، وراح تلاگيكم كومة مشاكل، وأكبر هاي المشاكل هي انكم من تگعدون أكيد ينرادلكم رئيس للكتله، ومن تجون تنتخبون الرئيس راح تنلاص ويجوز تتفلشون، گولوا ليش: وآني أگلكم لأن كلها راح تگول آني الي أصلح رئيس وبس، ويمكن يطلعولكم چم أبو جاسم لر، يگللكم لو وحدي ألعب لو أخرب الملعب.
هاي إشلون راح تحلوها... لعد ما الكم غير تنتظرون المحكمه وعاد جيب ليل واخذ عتابه.  

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

774 زائر، ولايوجد أعضاء داخل الموقع