الگاردينيا - مجلة ثقافية عامة - ميعيب غير المعيوب

ميعيب غير المعيوب

ميسون نعيم الرومي

ميعيب غير المعيوب

بايع وامخلص مذنوب – ميعيب غير المعيوب

تحلف .. متعلم مـَـتـّـوب – كلشي امقيد هالمكتوب

اشكال العادات ألوان

متأصله اوصارلهه ازمان

العادات اتبدلهه اچفان

اليابس غصن المعلول – بالزايد وايزيد انوب

يتحجج يخلط اوراق – ايفسر كلشي اوبالمگلوب

ميعيب غير المعيوب

***

لاتامن يچذب خوان – يحلف وايطب القرآن

للشط ايوديك اتروح – ترجع خايب هم عطشىان

چذب امسفط ماله أساس

نفس الحمام اوهالطاس

قوة عين ابلايه احساس

يحلف الآف الإيمان – واليچذب ماضنه ايتوب

عمره اويگضيه ابـسختات – لوتي اوعنده اهوايه ادروب

ميعيب غير المعيوب

***

مرض المزمن عيب ايطيب – داء البوگ أصعب داء

بواگ الكحله امن العين – من الألـْـف .. الـْحـَـد الياء

يسلب ينهب ماكو احدود

زور الشاهد للمشهود

ايجود ابرشوه امن الماجود

لا يشبع لا يروه ايلوب – مزروفه وابكرشه اجيوب

يهمـش وايلملم فرحان – نگطه اوطاحت يا (مهيوب)

ميعيب غير المعيوب

------------------

29/اكتوبر/2018

ســــــــتوكهولم

الأبراج وتفسير الأحلام

المتواجدون حاليا

519 زائر، ولايوجد أعضاء داخل الموقع