حقج يا يمة تبجين أعليه

التفاصيل

تم إنشاءه بتاريخ الأربعاء, 13 تموز/يوليو 2016 21:53

كتب بواسطة: مثنى عبيدة

مثنى عبيدة حسين

حقج يا يمة تبجين أعليه

قصيدة على لسان شهيد الكرادة وشهداء العراق رحمهم الله جميعا

حقج يا يمة تبجين عليه
يوم شبت النار بيه
أعذريني ما جبت عيدية
لاخواتي اليتيمات عند الفجرية
جانن ينتظرن مني الهدية
بعد ما أبيع كل البسطية
بس يا يمة غدرونا العمايم والأفندية
وحقج يا حبيبة تبجين عليه
ذبحوا علي وعمر على الهوية
داني والمندائي راحوا بلا حنية
قتلوا أبن المسلمة والمسيحية
وسبوا حتى اليزيدية
يتموا أطفال ورملوا العراقية
الحرة الكريمة الأبية
أجتمعوا أهل الشر والأذية
رادوها فتنة بخطة جهنمية
بس ما عرفوا شيمة العربية
ولا طيبة وصلابة الكوردية
وما حسبوا حساب التركمانية
يمة يمة أحنا بالجنان العلية
وجهنم مستقر للأنذال أهل الردية
ندري يا يمة بريء أبن الأنبارية
وحزنت سامراء والموصل والديوانية
وكبرت الجوامع والكنائس ويها مسبية
الحزن والسواد بالبيوت العراقية
نازحون ومهاجرون صغار وكبار حتى الحجية
أهلنا العراقيين اهل الطيبة والدموع المجرية
على الخدود وحجايتهم دوم خطية
لأن الرحمة والحنان رضعناها من الصغرية
أي العراقي أبو دميعة أبو الحنية
بس أخو خيته لو صعدت الغيرة العراقية
عرفناكم يا قتلة يا مجرمين يا خزي ويا عارية
عبيد عبيد حتى لو سكنتم القصور الرئاسية
يمة سلامي لخطيبتي السومرية
كوليلها مع الأسف لا خبر لا حامض حلو لا جفية
لافرح لا عرس لا واهلية
خلصت وأنتهت قصة حبنا الازلية
عند القبر خليها تحط المزهرية
وتشتم الوردة اللي أحبها الوردية
أعذريني حبيبتي والله رحلت مو بديه
وحقج يا يمة تبجين عليه
وحقج تبجين  يا العراقية
يا بنت مريم العذراء اللي ذكرها خالد للأبدية
أشعلي الشموع للراحة السرمدية
لأخوج العراقي أبن المحمدية
اهلي العراقيين اخذوا بثارنا من الحرامية
لا يضحكون عليكم بالخرافات المنسية
اليوم كل العراق أخوة وأهلية
ثوروا ولا تهابون المنية
ترى الموت بشرف أكرم من الوطية
ثورا لأجل نسترد عراقنا والوطنية
لأن العراق عراقنا مو لأبن الإعجمية
وأقصد بيها كل الدول شرقية ولو غربية
نعم لأن كلكم تروحون فدوة لأبن العراقية
لأن كلكم تروحون فدوة لقندرة أبن العراقية

https://www.facebook.com/nidhal.garmo/posts/10154369145384851
ــــــــــــــــــــــــــــــــــــــــــــــــــــــــــــــــــــــــــــــــــ
مهداة الى أرواح شهداء الكرادة وكل شهداء العراق
11 / 7 / 2016 م

الگاردينيا:الأخ الأستاذ /مثنى: