حچاية التنگال ٧

                                                 

                              د.سعد العبيدي

أهل گبل عدهم مثل یگول ذيل الچلب ما ينعدل لو تخليه 40 يوم بالگصبهَ. خطيهَ عدهم الأربعين كلش چبيرهَ. ولكم دگعدوا من گبوركم وشوفوا إشديصير، مو صارلنا (13) سنة وما إنعدل لا ذيل الچلب ولا غيره، واثبتلكم هذا الحچي لزم يد:

وزارة الصناعة طلعتْ تبچي وتگول يمعودين شركات التصنيع مالتنا تنتج ومحد يشتري إنتاجها، گلنه والله العظيم حقهم والإنتاج الوطني فوگ الراس، ولو هاي مو جديده عدنهَ (مغنية الحي لا تطرب).

طلعت وراها وزارة الدفاع سوت مؤتمر صحفي گبل چم يوم وگالت رِدتْ أشتري من شركات التصنيع خوذ فولاذيه وبساطيل أجلكم الله، ودروع، وجابت الشركات النماذج بسرعه، ولمن فحصناها تبين، الخوذهَ تنعفس بطلقة بعيدهَ ويمكن ببوكس من عدنان القيسي، والدرع ينزرف بطلقة مسدس، والبسطال الي مسعرته الشركة بـ(26) ألف لگوا منه بالضبط معروض بالسوگ صناعه صينيه وبـ(16) ألف دينار.
تبين شركاتنا مال التصنيع عافت الصناعه وراحت تشتغل تجاره.
نب واحد من الگاعدين وگال هاي مؤامره، الي بصفه گال لا هاي كلاوات ومو جديدهَ، نفسهم بالتصنيع يا ما قشمروا ذيچ الحكومهَ، ووحده من كلاواتهم، گالولها نزود مدى المدفع (57) ملم حتى ينوش الطيارات الامريكية الأف (16) وغيرها، المنجمه بالسما فوگ، وبعد إشحد اليطير بسمانا.
وطولوا السبطانه باللحيم، ونگروا المكرمات حسب الأصول، وصارت الحرب، ورمت المدافع أم السبطانه الطويله، وتملصت كل السبطاين. أسألكم بالله ليش الروس غشمهَ ما طولوها بمعاملهم، لو يريدون يغشون مثلنا، وغيرها وغيرها.
هسة شدگولون بعدكم على الأربعين يوم لو تمددون، والله لو تسوها أربعين سنه هم ما ينعدل.     

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1098 زائر، ولايوجد أعضاء داخل الموقع