عيد ميلاد سوسو فانتازيا عراقية بقلم - إيمان ألبستاني

 

عيد ميلاد سوسو
فانتازيا عراقية بقلم - إيمان ألبستاني
 


ستوري : يمة ....يمة ...ترا اليوم عيد ميلادي ...وعازم كل اصدقائي بالكلية ....أريد أعلگها علگة ماصايرة

أم ستوري : يمة ستوري ....أحنا وين وليدي ...وحفلات عيد الميلاد وين ....مدشوف حالنا ...تريد تخزي روحك گدام اصدقائك ...انت مو گايل كلهم ولد نعمة وبيوتهم قصور ...اي حتى سكملي ماعدنا
ستوري : أنتي بس گولي أي ...ألكرويتات طلبتها من الجيران بالدربونة هسة يجيبوها ....والكيكة اشتريتها بفلوس العيدية ...والنفاخات دين من دكان ابو شكرية ...والشربت دين من دكان حجي محمد ...يمة لاتظّلميها
أم ستوري : أني گلبي ملزوم يول ...زين وأبوك ...والله لو يدري الا يطلگني يامصخم
ستوري : أبوية جاي يدك طاولي بالچايخانة ...مايجي الا لليل ...تكون الحفلة فاضة ...شمدريه يمة
أم ستوري : دشوف منو عالباب ....يمكن الجوارين جابوا الكرويتات
ستوري : تفضلوا ....تفضلوا ....رحمة على والديكم حطوا الكرويتات بالحوش داير حبل ....واني بالليل ارجعها الكم ...الف رحمة على ميتينكم
أم ستوري : ولك سويتها صدك ياأغبر ....دگوم شوف منو عالباب
ستوري : أي والله ابو الفرن دز الكيكة
أم ستوري : ولك هاي الكيكة شو زغيرة ...بيا حلك تحطها ؟ ....هاي ابوك الحجي يسويها نص لگمة
ستوري : يمة خلي اشوف الباب ...يمكن ابو شكرية دز النفاخات
صانع ابو شكرية : عمي ...عمي هاي النفاخات دزها عمي ابو شكرية ....ويكول لاتنسى فلوسها
ستوري : لا...شلون أنسى ...اني باجر أمر عليه بالدكان واحاسبه
أم ستوري : دشوف النفاخات لويش ...شنو مدينة العاب ؟
ستوري : يمة هاج انفخي ....هاي اصول حفلات عيد الميلاد ...مو اشوفهم اصدقائي بالكلية شيسوون بحفلاتهم
أم ستوري :يمة اني منين اللي افاد انفخ هلگد نفاخات ...حباية الضغط نسيت اخذها اليوم
ستوري : خلي اشوف الباب ....هذا حجي محمد دز الشربت ونص قالب ثلج
أم ستوري :حسابك ثكل يول من ورا حفلة الگشرة.....دشوف الباب ....شوف شنو هالهوسة
ستوري : أي يمة ....هذولة جماعتي ...جايبين مزيقة .....هاي كايز ...بليس كم أن
ألمزيقة تدك : عيد ميلاد سوسو ......عيد ميلاد سوسو
اصدقاء ستوري : هاي شنو سوسو
ام ستوري : سوسو منو ؟ .....أيا أغبر اذا صدك
أصدقاء ستوري : عوع ....عوع ....هاي شنو ....طلعت ساكن بحي شعبي ....احنا فتنا للدربونة لحكونا هذولة اهل الاجهزة الموسيقية ....والشارع كله طلع يباوع علينا ....دشوف البيت تكول راح يوكع ...أيل للسقوط اصلاَ ...انت مو كلت بيتنا بالحارثية ...اشو طلع بالفضل
ستوري : مو عدنا بناء بالبيت ....بابي ديسوي مسبح وتدرون عمالة وطوز ....اجينا هنا مؤقت ....خلونا نركص هسة على الموسيقى
ألمزيقة تدك : عيد ميلاد سوسو ......عيد ميلاد سوسو
أم ستوري : ولك سوسو ....شوف منو عالباب ....عليش قفلت الباب ...دكوم افتحه
ستوري : يمة غارة ....هذا أبوية ....سودة مصخمة ....هذا شجابه هسه
حجي رزوقي : ولك منبوش الصفحة هاي شنو ؟ .....شنو هالهوسة والمزيقة ؟ أمك اتزوجت ؟ ......وشنو هالكرويتات ؟ أمك أنتشبت ماتت ؟
ستوري : يابا ...فدوة أروحلك...ذب الجراوية كدام اصدقائي ....احنا مسووين حفلة عيد ميلاد...فدوة اروحلك لاتخزيني
حجي رزوقي : ولك احنا مال حفلات ....وشنو هالخنافس المخانيث جماعتك ...ولكم اكعدوا سنطة ....والا اسمط ابو ابوكم بالحزام
اصدقاء ستوري : واو .....شكد عصبي هذا عمو
حجي رزوقي : هاي شنو ....مخدة
ستوري : لايابا .....هاي كيكة مالتي ....عوفها دخيلك
حجي رزوقي : ولك على لحم بطني من الصبح ....ناوشني اياها
ستوري : لا يابا ....فدوة اروحلك ....مو هية مراسيم ....لازم اطفي الشمعة ...بعدين ناكل
حجي رزوقي : ولك اثول ...ناوشني اياها ....وديرلي شربت بالتنكة ...هذا شنو الورد ....هماتين ينكل
ستوري : يابا ....لاتأكل الشموع ....مو خزيتني
ام ستوري : ستوري يمة شوف الباب
الجيران : ستوري ....نريد كرويتاتنا هسة ....مانمشي الا نأخذها
ستوري : يمعودين شلون مخازي
ام ستوري : ستوري يمة شوف الباب
ستوري : ها أبو شكرية ؟ خير ؟
أبو شكرية : اريد فلوس النفاخات هسة ....لو اطكطكها كلها
ام ستوري : ستوري يمة شوف الباب
ستوري : ها حجي محمد ؟ خير ؟
حجي محمد : اريد فلوس الشربت ونص قالب الثلج ...وما طالع الا اخذ فلوسي
أصدقاء ستوري : أحنا رايحين .....عوع ...عوع ...حفلة كلها بالدين
ستوري : هاي وين يمعودين .....زين وين الهدايا؟
ألمزيقة تدك : عيد ميلاد سوسو ......عيد ميلاد سوسو
ستوري يدك على رأسه ...انهجم بيتك سوسو ......انهجم بيتك سوسو
أم ستوري : يمة وليدي لاتبجي ....سودة علية ....شكد كللتلك لاتلبس الا ثوبك ....ابو المزيقة ....دك يمة دك

 

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

669 زائر، ولايوجد أعضاء داخل الموقع