حرشة باصدقائي واخوتي المصالوة !!!!

                                               

                          سيف الدين الألوسي

     

حرشة باصدقائي واخوتي المصالوة !!!

أمثلة مصلاوية وتطبيقات عملية !! ترجمة وشرح من قاموس اكسفوغد !!!!! مصلاوي - بغدادي

١- ألف حب ينكسغ والمخمغة موجودي !
معناها وفاة الشباب والناس المفيدة وبقاء العجايز والشياب ،، الملكة ليزا وبعلها احسن مشابهة !!!! والعديد من الذين عزرائيل ينهزم منهم ومثل تشيني ووووووووووو !!!!!! وجودهم اذية ،، وستيف جوبز نزل بالگبور في قمة انتاجه !!!

٢-الما حضي ابأول صباتو ، انكسغ منجلو والوقت فاتو !
لمن ضاع شبابه وعمره الانتاجي ولم يفعل شيئا ،، كل فايدة بعدين ماكو ،، مثل معظم العراقيين !!!! وين ميرحون منجلهم مكسور ومزنجر !!!

٣- أحد كن تفل تفلي ولطعا !
ولمن يساعد ثم يأخذ مساعدته ومثل دول الخليج وبعض الدول الكبرى والبنك الدولي !!!! ينطون باليمنه وياخذون باليسره ،، وكو ناس شبعوا تفال من زمان !!!

٤- اليشتغي مليح ، يبقى مستغيح !!
يعني لحد يشتري بضاعة او سيارة صينية لو ايرانية تشلع گلبه طول عمره ،،
اخذ ياباني لو امريكي لو الماني وارتاح . واللي يوقع عقود نص ردن ويه شركات نص ردن ،،يبقى الله مطيح حظه طول عمره !!!

٥- بعنبايي يسكغ. !!!!
للي ينلعب بسرعة ويصير زوج ،،، ويأتي ايضا ينطغم بسوسايي ويسكغ بعنبايي !!! اني خو بنص عنبايي اسكغ !!!!!!!!

٦- الطويل يقضي حاجتو ،، والقصيغ يموت بحصغتو !!!
للمكرود الماعنده واسطه !!!!!! ولا عرف لا بالحكومة ولا بالاحزاب !!! ولا عنده دولة عظمى تسانده من صدك ،، فيصير مكفخة للرايح والجاي ،،، ومثل الدول المدللة والدول الحايرة بزمانها !!!

٧- الف قلبي ولا غلبي !!
يعني الواحد يگلب الف گلبه ويبدل گير اذا شعر بخسارته او تضرر مصالحه ،، ومثل ساسة اليوم بس عملوا بتطوير المثل الى مليون قلبي ولا غلبي ،، ومن اسلامي متطرف الى ماركسي ملحد والعكس صحيح !!!!!!!!!!

المصدر للامثال : كتاب معجم الامثال الموصلية للمرحوم عبد الخالق الدباغ
المطبوع سنة ١٩٥٦ والناشر عبد الرحمن كركجي .

مع محبتي لكل المصالوي ،،. اهل التراث الجميل ،،،، بكل اديانهم ومللهم .

  

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1440 زائر، ولايوجد أعضاء داخل الموقع