عرب وين ؟؟........ وإيران وين؟؟؟

                                         

        عرب وين ؟؟........ وإيران وين؟؟؟

                   فانتازيا عراقية - بقلم إيمان ألبستاني

                          

     

         

أبو ضوية : خير أبو نجيبة داز علية ...وگعّت حيلي ....بيك شي؟؟

أبو نجيبة : دأگعد هسة ....يول كويظم فد أستكانين جاي ونرگيلة ...أي رايدك شغلة جبيرة لاوالله مصيبة

أبو ضوية : خير أبو نجيبة ؟ عبود ألعربنجي طلّگ فخرية أم ألجبن ؟

أبو نجيبة : ياعبود ياجبن ...ألشغلة أكبر تخص دول من ألبارحة سمعت من ألراديو محاضرات من دكاترة ...وأني ياأخوي مو تمام ...مو زين ماجبتك من بيتك بنص ألليل؟؟

أبو ضوية : شلون يريد يهّبط حيلي ....ترا ثلثين ألحيل راح ليگدام

أبو نجيبة : أنت سامع بقوانة أسرائيل وفلسطين؟؟

أبو ضوية : أهووووووو ...يمعود من چنا جهال وليومك هذا ...بس أللي ذابحني هلگد دزينا صابون وتايد وشكر ...عجباً وصلهم لو لا؟؟

أبو نجيبة : عوفك من أللي دزيته ...شنو رأيك أكو دولة محتلة گاع وبشر ٨ مرات أكبر من فلسطين ولاأحد يحجي ولاهم يحزنون

أبو ضوية : يمعود أخاف جاي دتتشاقى .....على فلسطين نبشوا أبو أبونا ...فوگاها ٨ مرات أكبر...لاأبشرك نشرد أحسن

أبو نجيبة : أي وألله إيران أحتلت ألاحواز من سنة ١٩٢٥ مساحتها ٨ مرات أكبر من فلسطين وبيها ٨ مليون بشر ولااحد يحچي ولااحد يگول وكل ألنفط بيها ٩٥% من نفط إيران بالاحواز

أبو ضوية : بشرفك ؟ صدك دتحچي ولاأدري بهالجفصة أني أعرف تركيا هماتين محتلة , احتلت لواء الاسكندرونة تمام لولا؟

أبو نجيبة : تمام أغاتي بال ١٩٣٨ مو العرب كمش من الياخة , أسمع ألشغل ألزين ألمرتب ...وألله إيران صدك تعرف شلون تشتغل ...مو مثل ألعربان ..إيران مثل أسرائيل ...أثنينهم كارهين ألعرب ومحتقريهم ....أطماعهم معروفة ....وحدة بلعت فلسطين ...وألثانية أضرب ....تريد تبلع الجزيرة العربية والشام .....واذا أكو بعد ..... زايد خير

أبو ضوية - أي صدك أحنا سامطين أبو أبو أسرائيل طلعت أيران أضرب , ٨ مرات ألاحواز أكبر , هضيمة

أبو نجيبة - دشوف أثنينهم لغتهم مو مثل العرب , دينهم وحدة يهودية والثانية قلبت مذهب الشيعة للصفوية ...يگولك أحمدي نجاد من زار ألبابا أنطاه كتاب للفردوسي أسمه ألشهنامة كتاب مهم بي كل ملوك فارس ...شوف شلون يحبون بلدهم وحاقدين علينا من ايام الفتح الاسلامي

أبو ضوية : شهنامة ...هالطرگاعة شنو؟؟

أبو نجيبة : يگول ألفردوسي بهالكتاب ( تف عليك أيها ألزمن ألذي سمحت للعرب أكلي ألجراد أن يفتحوا بلاد فارس ويحطموا حضارتنا , ألعرب من يشرب من ألماء ألوحل بينما ألكلب في أصفهان يشرب ألماء من ألنهر ألصافي )

أبو ضوية : من هذا يكرهون ألعرب شغلة قديمة وبعدين بروح أبوك؟؟

أبو نجيبة : عمي عدا الكره ...ناس عدهم استراتيجية ويعرفون شديسون, شوف العراق أنبلع بلع , المشكلة مو سنة وشيعة ...اي هاي الف سنة عايشين الكل سوا ...بس من ورا ٧٩ والثورة مالتهم صارت ماكو شيعة ...صارت صفوية, أنت عبالك يحبون الشيعة العرب , أللي يصير صفوي أي , الباقي لا يگولك يسموهم ( عربو ) مثل الاتراك , زين بحرب ايران منو دافع عن العراق ضد ايران مو الشيعة قبل السنة , زين ليش هسة صار عدو الشيعة السنة ونسوا ايران , شغل ثكيل وداعتك

أبو ضوية : أي والله جنت تفوت للشعلة والحرية والثورة كلها لافتات شهداء , أنثرموا ثرم ولد الخايبة

أبو نجيبة : زين هاك مثل لاخ على ايران شلون تكتيك عدهم ويشتغلون على زرع عقيدة عند أجيالهم , صدر لدكتور أردني أسمه ( نبيل العتوم ) وهو خبير بالشؤون الإيرانية كتاب بعنوان ( صورة أهل السنة والجماعة في الكتب المدرسية الإيرانية )

أبوضوية - وشيگول بالكتاب؟؟

أبو نجيبة - هذا ألدكتور جمع شكو كتب مال مدرسة بايران وگعد قراها سطر سطر , يحچيلك العجب , شگد حاقدين على العرب والصحابة ويگولون ألكعبة مكانها قم مو مكة وهاي يربون ويطلعون اجيال على هيچ فكر!!

أبو ضوية :زين يعني أحنا مثل ألاطرش بالزفة

أبو نجيبة : أسمع أغاتي ولو ينطبق على العرب مثل ( نايم ورجليه بالشمس ) ,,,أكو باليمن مدينة أسمها ( صعدة ) بيها ألحوثيين يمها ميناء ( ميدي ) شكو شباب صفوي كويتي بحريني , سعودي , أماراتي, يمني , عُماني ... يركبون سيارتهم وينزلون بميناء ميدي ...گول وين رايحين ؟

أبو ضوية : رايحين للكنيص ...وأنا اخوك

أبو نجيبة : أي تمام ...رايحين للكنيص ....بابا رايحين ل ٣ جزر بالبحر الاحمر تنتظرهم سفن الحرس الثوري الايراني وتأخذهم لهاي الجزر مال أرتيريا هية عدها فوك ١٢٦ جزيرة , هاي ال٣ جزر بيها معسكرات تدريب على الاسحلة والتكتيك الحربي ويدرسوهم الحرب الاعلامية

أبو ضوية : وهاي الجزر الثلاثة هماتين محتلتها ايران من ارتيريا

أبو نجيبة : لا أيجار من هذا اللي مات ( هيلاسيلاسي ) ومأجر ٤ جزر لاسرائيل ...هلگد ما هية جزر غنية كل اللحم والخرفان والحليب مال أسرائيل يروحلهم من هاي أل٤ جزر

أبو ضوية : وهذوله يدربون على السلاح وباقي العربان مستانس وايد بالمولات وعاوج العگال ومسبّل عيونه للبنات و واحدهم أجبن من أسماعيل ياسين!!

أبو نجيبة :هاي ٣ جزر اسمها ( دهلك ) بيها كل الشغل ليوم أت في ألجزيرة ألعربية

أبو ضوية : صدگ على شنو الخليجيين مسّنحين عّگلهم , وبعدين ,,يول كويظم عمرّ النارگيلة ترا خنفست

أبو نجيبة : اللواء ( قاسم سليماني ) عسكري إيراني ( ذيب أمعط ) شغلتّه باني جيش ١٥٠ ألف واحد يدافعون عن بشار الاسد , هالاثول منين عنده جيش , سلاح أي عنده , بس زلم تكاون ماكو . هاي شغلة أيران عاضه سوريا بيديها وأسنونها

أبو ضوية : وألله مصيبة , زين ولبنان؟

أبو نجيبة : لبنان بيها حكومتين وحدة شرعية وبرلمان والثانية حكومة حزب الله , والحكومة ذابتها لواگة حيل ويا حزب الله يخافون منهم , متسلحين لخشمهم

أبو ضوية : وألله يابا شغلة أتدوخ صدگ

أبو نجيبة : وحزب ألله شبع سلاح وگام يبيع سلاح لاوربا الشرقية , هنگاريا , ورومانيا والجيك , كل معاملهم بالجنوب

أبو ضوية : بصف أسرائيل , حلو , وألله أللي يگول امريكا واسرائيل وإيران مو صلح فلا يفتهم

أبو نجيبة : تعرف من رادوا يغتالون حسني مبارك بالحبشة من راح لقمة افريقية

أبو ضوية : أي أتذكرت طلعوله على الطريق وتصادموا وانكتل منهم وفشلت المحاولة

أبو نجيبة : أي وأجى ألامن ألحبشي شال المقتولين وشال الاسلحة , بيها ريموتات عسكرية , لاهي روسية , لاهي جيكية , أخذوها للبشير ابو السودان , گال أي هاي اسلحة اشتريناها من حزب الله

أبو ضوية : شغلة ثگيلة

أبو نجيبة :وهسة الرئيس اليمني ألجديد ألمگرود ناشف ريگه ويا الامريكان يشكيلهم عالحوثيين وتجاوزاتهم , وامريكا أذن من طين وأذن من عجين , ترگصلها بسبع جفافي

أبو ضوية : أي هاي أمريكا أم ألفواين وألدگايگ

أبو نجيبة : ألبحرين رادت تسقط ألا شوية لو مو درع الجزيرة وافتهمتها السعودية ولو متأخر

أبو ضوية : وألكويت يابعد عمري

أبو نجيبة : أكو واحد هو أكبر متخصص بشؤون الدول الصغرى اسمه (روثشتاين) يكول الكويت وقطر والبحرين كلها ماكو سنة ٢٠٢٥ وداعتك الكويت يفوتولهم جفت شلون الجنود العراقيين الفجر من طبوا گالو للكويتين جيبوا مفاتيح سياراتكم .... لا هل المرة ألايرانيين ياخذون نسوانهم من جواهم

أبو ضوية - أي بس مرتبين أمورهم مجلس أمة وبالك عنا

أبو نجيبة - وداعتك فايت ألماي من جواهم ولايدرون , هسة عدهم عضو مجلس أمة چان قبل متهم بتفجير موكب أميرهم اللي مات ( جابر ) وانصاب برجله بمواجهات مع الامن , گاعد هسة بصدر المجلس عضو فعال ويحكم ويشّرع تسأل حكومة الكويت شيسوي هالصفوي اللي راد يغتال امير البلاد بمجلس الامة ؟

أبو ضوية - أي أكيد يگولون حيّاك الله يبا . هي وحدة وطنية , لاتصير طائفي , ترا حنا أسرة وحدة

أبو نجيبة - وعضو مجلس لاخ متهم بأرتباطه مع المخابرات الايرانية ايام حرب العراق وايران وتسجيلاته باليوتوب ينادي بأسقاط ألسعودية

أبو ضوية - أي عضو مجلس أمة وجاسوس ومستانس وايد

أبو نجيبة - وعضو لاخ متهم بتفجير الحرم الشريف حكمته السعودية بالاعدام , راحت حكومة الكويت تبّوس قنادر , طلعوه من الحبس وجابوه وحطوه عضو بمجلس الامة

أبو ضوية - صدگ قشامر

أبو نجيبة - مو گلتلك فايت الماي من جواهم - اللاخ متهم بحادثة أختطاف ألطائرة ألكويتية سنة ٨٨ , أختطفها ويا حزب الله وكتل كويتي وشمره من فوگ من الطيارة

أبو ضوية - لاأله ألا ألله , بس عالعراقيين فاكين عيونهم وحلگهم - أگول ومصر أبو نجيبة اشو ماجبتها بالطاري

أبو نجيبة - جايك بالحچي .ذاك أليوم وزير خارجية إيران (علي أكبر صالحي) زار مصر ووصل عرض ايران لمصر اول شي گال لمرسي هاي ٣٠ مليار دولار گدامك نقد كاش دولار ينطح دولار من مال حلال

أبو ضوية : أي وأخذها مرسي ؟

أبو نجيبة : دأسمع يريد من مرسي يفتحون سفارتهم وفوگاها گال اتعهد ب ٥ مليون سائح ايراني كل سنة وشكو مصانع متوقفة بمصر الايرانيين يشغلوها

أبو ضوية : وزين شنو بالمقابل ؟

أبو نجيبة - بس يريدون الايرانيين تسلمهم مصر مساجد الفاطميين حتى هما يرمموها ويديروها و وياها بس جريدتين ناطقة بأسمهم وبس ٢٠ الف مصري يدرسون بقم سنوياُ

أبو ضوية - أي أنطى فلوس وأخذ عقل

أبو نجيبة - هاي شلونك بيها ,,,صدگ عرب وين وإيران وين؟؟؟

أبو ضوية - والله عمي بحظي ببختي العرب طلعوا أكبر طنبورة ...يول كويظم حباية مال وجع رأس وحطها عالنرگيلة!!!

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

694 زائر، ولايوجد أعضاء داخل الموقع