البصرة الثائرة

ميسون نعيم الرومي


البصرة الثائرة

انتِ (البصره) الإبنچ ثار – ميدنـّـس أرضچ أشـرار

و(اسماوه) المعتصمه الصمدت – شوكه ابعين احزاب العار

اولايات اهلي .. اجنوب الثائر – اهـل الشـيمه و(المگوار)

انـتـوْ الشـعب اونـِعـْم القائد – يـشـهـَـد تاريخ الثـوار

شعب اليصمد حي مو ميت – يـرفـَع رايات الأحـرار

والباغي خايـف كل وكته – خايـب وابحـُكـمه المنهار

معلومـَه انهايتكـم بانـت – يكنسـكم شـعـبي المغـوار

***

انهض ازحف شيل البيرغ – فرصتكم .. شعبي الجبار

(سـاحة تحريـر) اتناديكم – انتفضوا وانتـوا الأحـرار

تتحاصص ملتهيه (الخضره) – بالبـوگ اويلحگهه العار

هيبتـكم من هاذه الكـرسي – يـوم اويـلهـَـب بيـكم نـار

(اعبادي) التزوير امأيده – واعـوانـَه الحـيـتـان اكبار

لوتصدگ رايد واتحاسب – ابدي (ابنوري .. وابعمار)

اتمجدون ابإيران اشبيكم – شعبي اضحيه الهاذه الجار

***

تخطب :- احموه المتظاهر – بالسـر اتگص ابمنشار

بجنازة ثايـر من تكتل – تمشي اتشيع چن ما صار

بلسانين اوتحچي اتصرّح – تتمسكن واتـْمـَـثـّـل أدوار

برصاص الحي تضرب بيهم – حطيت ابنعشك بسمار

دكتور انت ! كافي اتنظر – سبحه اومحبس .. شغلك صار

من يزحف شعبي ابأطيافه – واحدكم .. يركض كالفار

انتِ البصره الإبـنـچ ثـار – ميدنـّـس أرضچ أشـرار

---------------------

سبتمبر / 2018

ســـــــــــــتوكهولم

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

794 زائر، ولايوجد أعضاء داخل الموقع