بلگت بلگت تجون

التفاصيل

تم إنشاءه بتاريخ السبت, 16 شباط/فبراير 2013 12:44

مثنى عبيدة

بلگت بلگت تجون

الليل كله يفترون

 

هو وأخته يغنون

 

فرحانين يركصون

 

اليوم لا.. ما .. ما.. يرضون

 

يگعدون أو ينامون

 

تشوفهم يريدون يطيرون

 

ساعة جوه ينزلون

 

وساعة فوك يصعدون

 

گاعدين على الشبابيك ينطرون

 

والأبواب كلها يفتحون

 

وما تعرف شيريدون

 

نقدم الحليب والأكل ما يأكلون

 

تعبنه وما نفهم شيدورون

 

الليل كله يفترون

 

صوتهم يعلو وهمه يغنون

 

وإحنا أنريد نفهم شينشدون

 

بس نسمعهم يضحكون

 

يا رب خير خليهم دوم يضحكون

 

هذا أملنا وغايتنا بدنياهم يعيشون

 

بسعادة وهناء كلما يكبرون

 

زين هسه ما تنامون

 

وكضه الليل وهمه يفترون

 

 

الليل كله يفترون

 

بدأ التعب وبالحضن يترامون

 

بس قبل ما بالنوم تغطون

 

گولولي شنوه الموضوع  ما .. تسولفون

 

شبيكم مو نخاف عليكم توكعون

 

دا نشوفكم ما تركزون

 

بابا ماما تريدون تعرفون

 

شنو المطير النوم ومخليكم تسألون

 

لأن أحنا سمعناكم تحچون

 

وي العراق وتگولون

 

لأهلنا بلگت بلگت .... تجون

 

نفرش الورد ونرش ماي العيون

 

مشتاقين يا للي مكانكم بين الجفون

 

سكتت وأمهم.... حتى لا يسمعون

 

شلال الدمع ... لا لا يشوفون

 

أريد أحچي وي الليحچون

 

ماكو صوت حتى يسمعون

 

أختنگت بالعبرات وهمه يشوفون

 

أبوهم وأمهم چنهم ينِحبون

 

بابا بابا ماما ماما ...  شو ما تردون

 

شبيكم أحچوا لا تسكتون

 

أني وأختي اتفقنا من يجون

 

أهلنا نخليهم ينامون

 

بغرفنا وبفراشنا يتغطون

 

وهنا جدتي تگعد ونثردلها بالماعون

 

لأن نعرف كبرت وما عده أسنون

 

بالحديقة نساعد لما يزرعون

 

جدي وأخوالي اللي يفلحون

 

الأطفال بلعبنه نخليهم يلعبون

 

وبالمطبخ خالتي وعماتي يطبخون

 

أعمامي بالبيت يعَمرون

 

چنه اليوم عيد وبيه نعيد ويعيدون

 

عن بغداد إلنا خليهم يحچون

 

دجلة ولياليه واللي يسهرون

 

الماجينه شلون بيها يلمون

 

فلوس وحلويات من اللي يحنون

 

نلبس دشداشه وي اللي يلبسون

 

نصوم وي اللي يصومون

 

نوزع  تمر ولبن لليفطرون

 

الله أشحلوه لعبة المحيبس ولليفوزون

 

على صينية بقلاوة يلتمون

 

إخوة وأهل وأحباب يحبون

 

يتنافسون وباللسان يتعاركون

 

بس ما بيهم من يخونون

 

ولا لوطنهم ولا لأهلهم يظلمون

 

وبعد السمر والسهر كلهم يروحون

 

للبيت وللمحلة اللي بيها يجتمعون

 

الليل كله يفترون

 

أيه شيخلصك يا ليل اللي يسهرون

 

نام الولد و نامت البنت وكلساع يفزون

 

نايمين ويصحون ... وينامون و يحلمون

 

ها بابا بلگت أهلنا يجون

 

بابا أنتو أللمن تحبون

 

حبايبي انتو وأهلنه وكلمن تعرفون

 

يا عين أبچي على فراكهم بلگت يهلون

 

أدري بالعراق بعيونهم يربون

 

يگولون بس تعالوا لو تجون

 

نشوفكم ... قبل ما أهلنا يموتون

 

شوفتكم ترد الروح لو تعرفون

 

والله إحنا نكول بلگت تجون

 

خلص العمر بلگت نجي وبلگت يجون

 

نخاف نموت كلنا ولا تكتحل العيون

 

الله يخليكم صدقة لعمركم واللي يسمعون

 

بلگت نجي لو  بلگت  تجون

 

بلگت نجي لو  بلگت  تجون

 

ــــــــــــــــــــــــــــــــــــــــــــــــــــــــــــــــــــــــــــــــــــــــ

مهداة إلى كل طفل عراقي يحلم برؤية أهله أصله أرضه في العراق
 

 ـ كـُتبت على وقع فرح ٍ بانت معالمه على وجه ولدي الحارث يوم سمع بأن هناك من قد يزورنا من العراق

 ( وهي مجرد أمنية ) تعلق بها الولد ولم ينم ليلته عسى أن تتحقق هذه الأمنية

وما ذلك على الله بعزيز

12 / 2 / 2013 م