أهلي گمرهم

مثنى عبيدة



"أن جان أهلك نجم "
أهلي گمرهم

هلي أقمار والدنيا تدور بفلكهم
هلي رفعة الرأس وعالي نجمهم
هلي إقراء وتعلم من سيرهم
هلي الكل يأكل من صحنهم
هلي عالي نخلهم
غيرة وعزة نفسهم
وما تلكه والله مثلهم
هلي شماغ وبيرق علمهم
هلي العراقيين يا محلى أسمهم
فأن جان أهلك نجم .. أهلي كمرهم
هلي وشمحلى سمرهم
هلي العين غطى وي رمشهم  
البيت مفتوح والضيوف نزلهم
صغار وكبار تخدمهم
ذاك يصب الماي ويمسح دمعهم
وأمهاتنا على التنور يحضرن خبزهم
والزلم بالصواني تركض حدرهم
وأبو البيت معزب لأجلهم
هذولة هلي يامن لا تعرف كدرهم
فأن جان أهلك نجم .. أهلي كمرهم
هلي صابرين والصبر ما يصبر صبرهم
ماتوا جثيرين وما يخلص عددهم
تريد تعرف فعلهم
لو تمتحن عزمهم
 
هلي يموتون دون أرضهم
هلي هم  سامع نخوتهم
لو تنخهم الحرة يفور غضبهم
تعرق الكصة ويحمر وجهم
يرخصون الروح لأجل عزتهم
هلي تعرفهم من مشيتهم  
تلكهم أسود ومعروف ٍ  عزمهم
هلي وسفه اليوم وحدهم
بس يبقى مر لحمهم
فلا تضحك على مرضهم
يشفون بإذن من رحمهم
ويرجعون هلي .. عالي كمرهم
هلي أكرم الكرام عربهم
هلي منو يلحك طيبة كردهم
هلي ويا محلى محبة تـُرُكهم *
هلي يا معلى مآذنهم
تتعانق وي كنائسهم
هلي بالماي محاربهم *
عراق كل أديان الله جمعهم
فإن جان أهلك نجم .. أهلي كمرهم
هلي واضح نسبهم
هلي لو تكتب للصبح ما توصفهم
لأن البشر كلها تعرف حضارتهم  
عجلة وقانون وعلم بصرتهم  
تقوى ودين كوفتهم
والموصل ذيج منارتهم
إربيل مبددة وحشتهم
الأنبار بالكرم منهو يلحكهم
وبالعاصمة بغداد لمتهم
وشو أوصف مدنهم
كلها بيوتنا اللي جامعتهم
لأن العراق أبو وحدتهم
 
فأن جان أهلك نجم أهلي كمرهم
هلي بالجوبي يا محلى لمتهم
والمطبك يعزف يحلي ركصتهم
والنسوان بالهلاهل تفزعهم
عراقين والنعم وثلثة أنعام عشرتهم
بيرغ الشرجية وعكال الغربية فخرهم
و بإذن الله ما تنذل رايتهم
فأن جان أهلك نجم فأهلي أكبر نجمهم
أن جان أهلك نجم .. ترى والله أهلي كمرهم
ترى والله أهلي كمرهم
عراقيين ويا محلى أسمهم

*أهلنا التركمان الأصلاء
* أخوتنا الصابئة المندائيين
*أن جان أهلك نجم* / مطلع قصيدة للشاعر البدوي عبدالله الفاضل
***
الى أهل العراق الأصلاء الشرفاء أهدي كلماتي
شدة وتزول يا أهلنا الطيبين
بإذن رب العالمين
أخوكم وأبنكم
مثنى عبيدة حسين
23 / 4 / 2015 م


 
 

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

578 زائر، ولايوجد أعضاء داخل الموقع