والله عيني ما أدري !!!

                                  

                      سيف الدين الألوسي

في دراستنا الجامعية وفي كلية العلوم سألنا نحن الطلاب في أحدى المحاضرات وقبل 39 سنة أستاذ الفيزياء الذرية(س وكان من أصحاب الكفاءات ومتخرجا من جامعة شيفيلد )..

عن المعادلة الفلانية !! فأجاب (والله عيني ما أدري!!!!)... وسألنا  بعد ذلك الرفيق ن ض د 4 جبار في ك الاستمكان بعد توقف التسريح للخريجين سنة 1980 شوكت نتسرح فأجاب (والله عيني ما أدري !!) ,, وسألنا ريغان شوكت تخلص الحرب (فأجاب والله عيني ما أدري !!) .. وسألنا السفيرة الاميركية صدك كلتيله للقائد الضرورة فوت بيها وعلى الزلم خليها بالكويت !! (فأجابت السفيرة المتقاعدة اليوم في جنوب أفريقيا, والله عيني ما أدري !!) .. وسألنا رئيس أركان الجيش  رحمه الله , رح ننسحب من الكويت فقال (والله عيني ما أدري !!) ,, وسألنا دي كويلار , شوكت رح تنحل مشكلة أسلحة الدمار الشامل ويرفع الحصار الظالم المفروض على قطرنا المناضل فأجاب (والله عيني ما أدري!!) .. وسألنا كوفي أبن عنان أشكد قبضت وكم سيكار شربت في الرضوانية على البحيرة فأجاب (والله عيني ما أدري !) ,, وسالنا غلوي ورغدة ووووو جيرنوفسكي , أشكد قبضتوا من فلان ومن كوبونات النفط فقالوا (والله عيني مندري !!) ,, وسألنا بريمر لماذا حليت الجيش ودمرت البلد وسرقته فأجاب (والله عيني ما أدري !!),, وسألنا الاخضر الابراهيمي لويش أنته رايح جاي فقال (والله عيني ما أدري) ,, وسألنا العراقيين من هم القاعدة والتكفيريين والميليشيات فقالوا ( والله والعظيم مندري !!) .. وسألنا اليوم كيف سقطت الموصل وكيف تبخرت ميزانية العراق واموله طيلة ثمان سنين فأجابوا ( والله عيني مندري !! ) ... وأخيرا سألت نائب رئيس الجمهورية العراقي  , باجر أشطابخين فاصوليه يابسة لو شجر لو تبسي بيتنجان فأفحمني بالجواب وقال( والله عيني ما أدري !!!!!) ... وهسه سألت نفسي منو أنت  يا من تكتب هذه السطور ومن أي بلد أنت ,وأجبت  نفسي ( والله عيني ما أدري ).

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1226 زائر، ولايوجد أعضاء داخل الموقع