أغلى الغالين

مثنى عبيدة

أغلى الغالين


صغار فرحانين
 
يرگرصون مثل المجانين
 
أيدهم بالحنة أمحناين
 
البيت كله زينة ورياحين
 
عصير وشربت للجاين والرايحين  
 
چكليت وكيك للطيبين
 
نشرات الضوء ألها أمعلكين
 
رشوا الماي وغسلوا الدرابين
 
أصدقائهم  كلهم مرتاحين
 
ليش لا واليوم مولد أغلى الغالين
 
أمي هسة بسوك العطارين
 
نسويلها مفاجاءة الربحانين
 
أخوي گلي ألبسي مثل الطباخين
 
واخبزي مثل الخبازين
 
أختي صابغه وجهه بريشة الفنانين
 
 
گضيناها لعب وأحنا فرحانين
 
صغار فرحانين
 
وصلت أمي وأحنا تعبانين
 
فتحت الباب وصحنا جوعانين
 
شمرت العلاگة و گالت أش عاملين
 
شنهوه ها الخبصة وشنوه خابطين
 
 لخاطر الله فهموني يا حلوين
 
يمه ترى ها أحنه مو ناسين
 
اليوم فرحانين مثل يوم العيدين
 
اليوم مولد أبونا نور العينين
 
أصفر الوجه وانشلت الرجلين
 
وگعت أمي ساكتة الشفتين
 
يمه .. يمه ردي بكلمتين
 
شبيـچ يا حبيبه يا أم الولد والبنتين
 
بـچن أخواتي وصاحن الصحتين
 
گعدت امي گالت أبقوا فرحانين
 
لأن أنتوا صغار حقكم فرحانين
 
صغار فرحانين
 
مشينا بسرعة مچلبين
 
بعباءة أمي ذات السوادين
 
الكيكة شيلوها لا توكع من الايدين
 
يمه شوا أحنا مثل المسافرين
 
وين نمشي  ؟؟ ترى أحنا خايفين
  
لا يمه لا تخافون وأبقو فرحانين
 
أگعدوا وحطو الورد والرياحين
 
نحتفل هنا بين الترابين
 
لأن أبوكم يا يمه ... وي الميتين
 
شهيد وشهداء الغارة والغارتين
 
يا أبو فلان هذوله ولدك الحبابين
 
أحچوا لأبوكم شصار للزينين
 
ضاع الوطن وضاعت المروة والدين
 
ما كو احد لليتامى المحرومين
 
أهلك ضاعوا بين مهجر .. ونازحين
 
صغار فرحانين
 
بيچيت وأخواتي يوم وسنين
 
أكلنا الكيكة وشربنا غصة المساكين
 
يابه  أبوي  بابا  نحبك للآبدين
 
ما ننساك وتبقى من الخالدين
 
عندنا وعند الله رب العالمين
 
عندنا وعند الله رب العالمين
 
ـــــــــــــــــــــــــــــــــــــــــــــــــــــــــــــــ
كتبت على وقع مشاهدتي صورة أيتام عند قبر أبيهم يحتفلون بيوم مولده
اهدي كلماتي إلى كل يتيم والى كل إنسان يشعر بالأيتام
 
الجمعة 15 / 8 / 2014 م
 

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

816 زائر، ولايوجد أعضاء داخل الموقع